uMthunywa
Ngikhumbula ensukwini zayizolo bewuthi ungezwa kuthiwa ngekhefu uzavakatshela edolobheni uqede iviki yonke uguxuza imikenke ngoba ufuna ukuthi mzwana ufika ungakhanyi kakhulu umehluko wakho labantwana abavele behlala khona.
Kwakusaziwa ukuthi uzake uphumule ukuphathisa uhololo ngamaqebelengwane kumbe igwadla ngoba khonale kudliwa isinkwa esilejamu. Lezitshebo zakhona zihlala emafilijijni azivundi zihlala zisesimeni esihle.
Phela emakhaya uyaxhanxatha umhwabha olenhlamvana uzwe kuthiwa ngumuthi wesisu udliswa inyama esilephunga kodwa ngenxa yokuthi kuyabe kungela esinye isitshebo adle umuntu qede anathe amanzi.
Khathesi idolobho selaguquka sekudliwa noma yini ingqe kungabulali. Evikini eliphelileyo ngathi ngihambela duze komunye umkambo ngabona enye indoda ithenga amathumbu enkukhu, wona ayelokhu endizwa zimpukane ngoba eselephunga elithize, ngenxa yokuthi ayelentengo ephansi wawathenga lundoda waze watshaya umakhalekhukhwini wakhe esazisa ikhosikazi lakhe ukuthi isitshebo uyeza laso kungesikudala.
Ngazibuza ukuthi kambe amathumbu enkukhu wona angaba yisitshebo, ngabona omunye laye ethenga indlebe lamakhala ewotshi ngahle ngayifunda ivaliwe ukuthi idolobho selibasinda ungabona umuntu esetsheba ngezitshebo ezingaqedakaliyo. Ngathi ngifika emalokitshini ngathola kuthunqa intuthu kumaguma amanengi kudala wawuthi ungabona lapho okubaswe khona umlilo edolobheni uhle uvele wazi ukuthi kulomonakalo ngitsho imfa.
Inengi selisehluleka ukuthenga amagetsi ukuze bapheke, inkuni zakhona ezinye ngezimanzi ezesinga ezithengiswa ngokungonkabi kujahe imali kagologo. Ingcekeza esezitaledeni iyethusa kungani kulapho okuzalele khona amagundwane.
Bayabe bengela mali eyenela ukuthenga impuphu emhlophe besebedanela kumabele bayegayisa phela wona amabele intengo yawo iphansi akafani lomumbu.
Uzwa abanye bakhona sekuthiwa udokotela wathi ngingadli impuphu emhlophe ethi kuthiwa badle eyamabele betsho bewahutshuza aluhlaza tshoko okwenyongo yenkunzi yenyathi. Bayabe bengela mali eyenela ukuthenga impuphu emhlophe besebedanela kumabele bayegayisa phela wona amabele intengo yawo iphansi akafani lomumbu.
Sekwagejwa lezikotsho abantu bavuka ngovivi lukaMagadelina esiyabheka uJesu emathuneni besiyakukha amanzi . Akuseyilo idolobho layizolo esilaziyo.
Ungabona uhlala edolobheni usutsheba ngamathumbu enkukhu asewonakele vele uthuthe imitshaqana yakho uqonde lapho owavela khona kulokuba yinhlekisa.
Ayixabene
