uMthunywa
Thokozile Mbedzi
ABALIMI kundawana zonke zelizwe bakhuthazwa ukuthi badoze izifuyo zabo khathesi njengoba izifuyo sezisidla utshani obuhlumayo obulakho ukuba lezinanakazana ezingabangela ukuthi zigule.
UMnumzana Simon Mlambo onguLivestock Consultancy uthe abafuyileyo elizweni lonke kababone ukuthi bayadoza inkomo zabo.
“Abafuyi kundawana zonke zelizwe kabadoze izifuyo zabo ngoba utshani sobuhluma. Izifuyo kumele zidozwe ukuze zivikelwe kuzinanakazana ezingangena phakathi kwemizimba yazo zicine zigula.
“Ukudoza izifuyo kuqakathekile ngoba kuvikela abafuyileyo ngoba izibungwana ezitholakala etshanini zilakho ukubangela ukuthi izifuyo zicikizeke loba zife.
Inkomo
“Abalimi kumele njalo babone ukuba izifuyo zithola amanzi ahlanzekileyo angela zinanakazana ngoba zibangela imikhuhlane etshiyeneyo ezifuyweni,” kuchasisa uMnu Mlambo.
“Amanzi angahlanzekanga ayingozi ezifuyweni kungakho abalimi kumele balimuke ngoba kubangela ukuthi balahlekelwe yizifuyo zabo. Abafuyi kumele banike izifuyo zabo imithi eqondileyo ehambelana lezinanakazana ezikhona kodwa kumele baqale baye kwabeVeterinary Services abaseduzane ukuze bababhalele umuthi oyiwo oqondileyo okumele bawusebenzise.
“Lokhu kuyaphathisa ukuthi baphe izifuyo izilinganiso eziqondileyo ngoba inkomo ezincane lezinkulu kazinikwa izilinganiso ezifanayo,” kuphetha uMnu Mlambo.
