uMthunywa
Cornelius Luphahla
LOKHU ziphicekile njalo zizidla izibindi izakhamizi zesigabeni seMaphisa ngemva kokuvalwa kwezikolo ezimbili ngenxa yokukhathazwa ngondofa okubikwa ukuthi bebekhama abafundi ngesikhathi sezifundo.
Kubikwa iWhite Water High School leHalale Primary School zivalwe izikolo zingakavalwa ngoba ondofa laba besebebapikisa begqoke ezabo nanko phela bebebakhama, babatshayise ngezulu njalo behlukuluza ababalisi emacansini.
UMthunywa ukhulumisane lomunye wezakhamizi zakule indawo uMnumzana Steven Ncube ochaze ukuthi ondofa laba sebekhathazile sibili.
“Ondofa laba sebehluphile sibili ngoba lababalisi sebeze babikela izakhamizi bedinga usizo bethi labantwana abasafundi kuhle ngenxa yabo.
“Kuthiwa ondofa laba bahlukuluza ababalisi emacansini ebusuku babuye babadlele ukudla kwabo,” kutsho uMnu Ncube.
“Ngikhuluma nje abanye ababalisi bezikolo lezi bathi sebefuna ukusuka kulezizikolo bayefundisa kwezinye ngoba sebekhathele ngondofa laba,” kutsho uMnu Ncube.
Omunye wababalisi bakulezizikolo ongathandanga ukuqanjwa ngegama uchaze ukuthi ondofa laba noma nje bengazange bababone kodwa bonke babebahlupha kanye labantwana besikolo.
“Ondofa laba besebesithwalise nzima ikakhulu thina abesifazana, ubuthi nxa ulele uphuphe uzwe sengathi ulowesilisa njalo nxa uphaphama uthole usungasagqokanga njalo ulobudoda.
“Kwesinye isikhathi ubuthi nxa uphaphama kunjalo ubone umuntu omfitshane ephuma emnyango,” kuchaza umbalisi lo.
“Ekucineni besesilala ndawonye kodwa noma kunjalo bekuqhubeka kusenzakala lokhu. Kwakuthi kwezinye insuku sivuke sigqoke amapenti ababalisi besilisa bona begqoke awethu.
“Ekuqaliseni sasikufihla lokhu kodwa sabona ukuthi sonke sihlutshwa yinto nye. Yikho-ke okwadala ukuthi sikunanzelele ukuthi ondofa laba bebesitshintshanisela amapenti ethu,” kutsho umbalisi lo.
Induna yakule indawo uMalaki Masuku uchaze ukuthi indaba le uyayazi njalo sebize lezinyanga ukuzokhupha ondofa laba.
“Ondofa laba kuliqiniso sibili ukuthi sebehluphile ngoba lami bangibikela osobhuku. Ngikhuluma nje sidinge inyanga ukuthi zizohlahlula zikhiphe ondofa laba asebehluphile kodwa okwakhathesi angikezwa ukuthi inyanga lezi sezisebenze njani.
“Okubuhlungu yikuthi abanye abantwana besikolo seWhite Water High bahanjiswa ngakibo izikolo zingakavalwa ngenxa yokuthi basebeqhuqha bodwa bengasenelisi ngitsho lokubhala,” kutsho induna uMasuku.
UMqondisi wezemfundo esabelweni seMatabeleland South uNkosikazi Tumisang Thabela ubikele uMthunywa ukuthi indaba le kakayizwa kodwa uyajabula nxa izakhamizi sezizama ukuyilungisa.
“Indaba yabondofa abahlupha ezikolo lezi angikayizwa kodwa ngiyathaba nxa kuthiwa izakhamizi zakule indawo sezizama amacebo okukhupha ondofa laba ngoba ababalisi bazafundisa kuhle bengasaphanjaniswa ngondofa laba,” kuphetha uNkkz Thabela.
