uMthunywa
Ethel Ncube
KULAMANINA amathathu elokitshini leCowdray Park koBulawayo athumbe elinye inina insuku ezimbili belibhaxabula besola ukuba lijola lendoda yomunye wabo.
Indaba le yenzakale ngempelaviki lapho abetheswacala abathathu uLinda Sibanda, Samantha Ndlovu loSisasenkosi Mavundla abathumbe elinye inina (ibizo siligodlile) bayalibhaxabula ngoba lijola lendoda kaSamantha Ndlovu.
Kuzwakale ukuthi abathathu laba babona umamangala ehlezi phambi kwendlu yakhe bafika bambamba bayamvalela endlini kaSamantha Ndlovu.
Kubikwa ngesikhathi bemthumbile babembhaxabula ngezigodo babuye bamtshaya ngensimbi ebusweni lemzimbeni betshintshana ubusuku bonke.
Ngosuku olulandelayo babiza uSibanda wafika wambopha inyawo kunye lezandla bemtshaya futhi baqeda laye ubusuku besibili.
Amapholisa ezwa udletshana ahamba aya endlini kaSamantha bathola umamangala evalelwe endlini.
Umamangala wahanjiswa esibhedlela seMpilo lapho afika welatshwa khona.
UMthunywa uxhumane lesikhulumi samapholisa koBulawayo uInspector Abednico Ncube oveze ukuba amapholisa achwayisisa ngodaba lolu.
“Sibophe ababili uSamantha Ndlovu loSisasenkosi Mavundla besolwa ngecala lokuthumba. Ngikhuthaza uzulu ukuthi batshiye umkhuba wokubambana besiyakulwa. Ukuthumba lokutshaya ngamacala,” kuphetha uInsp Ncube.
