uMthunywa
Nkosilathi Sibanda
KULANDELA ukutshelwa ukuthi badilize umbuthano wabo, abaqeqetshi bakoBulawayo sebebike ukuba akulamthetho wenguqu abawephulileyo.
Inhlanganiso yeZimbabwe Soccer Coaches Association (Zisca) ibingafuni ukuthi abaqeqetshi bakoBulawayo bazimele bona, isithi kungangcono kumelelwe isisekelo sombuso esitsha.
Abaqeqetshi bakoBulawayo benza ukhetho lwabo ngomnyaka odluleyo kodwa inhlanganiso yabo enkulu yathi angeke kwenze ukuthi kube lezikhundla.
Kukhetho lolu, abaqeqetshi bakoBulawayo bavotela uBongani Mafu, owake waqeqetsha iqembu elikhulu eleHighlanders. UMafu usekelwa nguPhilani Mabhena.
Amanye amalunga nguMorris Mukwiti ongunobhala, uKudzayi Mhandire ongumgcinisikhwama, uKhona Tshabangu loJoseph Nkomazana abangamalunga.
Umhlangano wokuvumela ukusetshenziswa kwesisekelo esitsha seZisca ubuhleliwe esigodlweni kodwa abaqeqetshi bakoBulawayo kukhanya baqina ngokuthi eyabo inhlangano angeke ibuyele kukhetho futhi.
Kungumbono wabaqeqetshi laba ukuthi ukhetho abalwenzayo lusemthethweni ngakho ukubuyela muva angeke bakwenze.
Umfakazi ongumqeqetshi ophakathi kwalinhlanganiso yabaqeqetshi uthe ngempela umbono wabaqeqetshi bakoNtuthu uqondile.
“IZisca ifuna amalunga akoBulawayo adilize ukhetho abalwenzayo. Kubonakala njengokubuyela emuva ngoba loba sekule sivumelwano esitsha sokusebenza kwenhlanganiso enkulu, ukukhetha abammeli koBulawayo kwenzelwa ingqubekela phambili,” kutsho lumfakazi owesabe ukuqanjwa.
Kodwa, unobhala wakoBulawayo uMorris Mukwiti wazise intatheli ukuba akulanto embi ngokuthi benze kutsha ukhetho.
“Nxa kumele sivote kutsha, sizakwenza njalo. Ukhetho lwethu lwalufanele njalo lusemthethweni. Njengabaqeqetshi abalandela izinqumo, sizakwenza okufaneleyo.”
