uMthunywa
Ethel Ncube
KULAMADODA amane elokitshini leMagwegwe koBulawayo abanjwe xhaka ebusuku lenyama yenkomo akade beyitshontshe emakhaya beyithengisa.
Indaba le yenzakale ngempelaviki lapho amapholisa ancwetshwe khona indlebe ukuba kulenye indlu ethengisa inyama yenkomo ezitshontshiweyo bahamba bayachathama babamelela bababamba.
Kuvele ukuba umsolwa uTawanda Kisimilo oleminyaka engu-24, uMabheka Ndlovu oleminyaka engu-32 uDoubt Moyo oleminyaka engu-29 loCollen Nyathi basolelwa ukutshontsha inkomo zabantu emapulazini eMatobo.
Kubikwa ukuba abasolwa laba babuya lenyama le ngemota ebusuku bafika lenyama yenkomo elesisindo esingange 374kg ebiza US$1 600 bafika bayethula amapholisa ebakhangele bona bengaboni. Ngemva kwesikhatshana amapholisa angena abamba uCollen Nyathi okunguye abamsebenzisa ukubamba abanye.
Kubuye kwavezwa ukuba abasolwa laba bebefihla izigogo lamacici afakwa endlebeni zenkomo emangcwabeni ePelandaba nxa sebetshiye inyama le zonke izikhumba zenkomo ababezifihla emangcwabeni bazithola kanye lomnikazi wenkomo laye wenelisa ukuba aqambe ukuba inkomo ngeyakhe ngoba wayebikile emapholiseni.
Intatheli ixhumane lesikhulumi samapholisa koBulawayo uInspector Abednico Ncube oveze ukuba udaba olunjalo waluthola.
“Ngikhuthaza umphakathi ukuba inkomo azidake umtshiso lamacici endlebe ukuze nxa zithe zatshontshwa wenelise ukuziqamba. Ngibuye ngibonge uzulu njalo ngokusipha umbiko lo osincedisileyo ukuze zibambe izigangi,” kuphetha uInsp Ncube.
