uMthunywa
Ethel Ncube
INDLELA yokuthetha amacala esintwini ibiyindlela yokukhuza njalo ibambanisa umphakathi, lokhu kuvezwe yinduna yeTsholotsho uGampu ngesikhathi uMthunywa uvakatshele esigabeni sakhe.
INduna uGampu iveze ukuba enkundleni yakhe yokuthetha amacala ayehlukanisi muntu kungabe kungomama obaba kumbe intsha, wonke umuntu uyangena enkundleni kusiya ngecala elikhona
UChief Gampu
Ekhuluma loMthunywa, iNduna uGampu iveze ukuba endaweni yayo ungaba lecala uqala ngaphi.
“Umuntu nxa eselecala osobhuku bami bayaqala bahlale phansi lomamangala lomamangalelwa kukhulunywe ngecala lakhona, nxa kusehlula ecaleni lakhona kungekho ovumayo ukuba wonile yikho lapho icala osokungabekwa ilanga abantu babuye enkundleni yenduna,” kubika iNduna uGampu
Uqhubekele phambili eveza ukuba isigwebo esiphiwa olecala ngesokuqondisa.
“Thina nxa ulecala ungaphiwa isigwebo ayisikho ukuthi sigijimisa imali kumbe lokhu esikugwebe khona kodwa yindlela yokuthi umuntu abone ukuthi uphambanisile angaphindi akonileyo. Ekugwebeni lapha siyakupha isikhathi sokuthi udinge inhlawulo efunekayo uyilethe nxa suyitholile. Esikukhangelayo yikubambanisa abantu lokukhuza nxa sithetha amacala enkundleni,” kuphetha iNduna uGampu.
