uMthunywa
Gladmore Ncube
ININA lamadodakazi alo amabili lithole ukubeka phansi iphika ngemva kokutholakala kwempahla yangaphansi yabo ngomunye umphurofethi odumileyo obebasiza ngohlupho lohlukuluzwa emacansini ngenye indoda ngalokhu okubizwa ngokuthi ngumbobobo.
Isehlakalo lesi senzakale elokitshini lePelandaba emangcwabeni lapho umphurofethi lo akhokhele inina leli bathola impahla yalo yangaphansi kanye lezamadodakazi alo okubikwa yabekwa lapho yindoda ebibagangela isebenzisa amandla emangcwabeni.
Inina leli (ibizo siligodlile) labantwabalo besebelesikhathi bekhathazwa ludubo lolu njalo kubikwa ebusuku bebengalali besetshenziswa yisigelekeqe lesi.
Intatheli ikhulumisane lomama lo obehlaselwe ngumbobobo wathi useze wathola ukuthula emzini wakhe ngenxa yosizo lukamphurofethi Mutumwa webandla leJohane Masowe weChishanu oze walonda impahla yabo yangaphansi ebifihlwe amangcwabeni.
“Sengilesikhathi eside labantwabami silala sihlukuluzwa emacansini ngumuntu wesilisa esingamaziyo. Besivuka silezitshengiselo zokuthi besihlangana lomuntu wesilisa kodwa singazi ukuthi kwenzakala njani.
“Umkami usebenzela ngaphandle kwelizwe kodwa nsukuzonke bengivuka ngikhathele okomuntu ohlangane lomuntu wesilisa njalo lezitshengiselo zakhona bezimgceke.
“Okubuhlungu yikuthi abantwabami basesebancinyane kodwa lumuntu ubebahlukuluza kunjalo,” kuchaza inina leli.
Uqhubekele phambili waveza ukuthi usizwe ngumphurofethi uMutumwa owambamba ngomoya ngeSonto enkonzweni eyayiseMganwini wamtshela ukuthi umuntu lo omenza umbobobo uthola amandla akhe emangcwabeni.
\“Umphurofethi wangitshela ukuthi umuntu ongigangelayo uhlala elokitshini lethu njalo wangena endlini yethu watshontsha izigqoko zethu zangaphansi labantwabami.
“Umuntu lo kuthiwa usebenzisa izigqoko zethu zangaphansi ukuze asenze umbobobo njalo amandla ewathola emangcwabeni ngoba esetshenziswa yimimoya yabantu abafayo.
“Inkonzo yathi isiyaphela sahamba sayafika emangcwabeni laye umphurofethi labanye abazalwane umphurofethi wakhuleka, eqeda lapho umoya wambonisa ukuthi izidwaba zami zangaphansi zifihlwe ngaphi,”
“Ngafika kwelinye ilitshe elikhulu ngaphansi kwesihlala kwathiwa ngilivule ngaliphakamisa ngathola impahla zami zangaphansi lezabantwabami ezacatsha kudala kanye lezigubhu zemithi ezimbili,” kutsho lelinina.
Intatheli ikhulumisane loMutumwa othe abantu kumele bazi ukuthi kukhona abantu abahlasela abantu ngalindlela kungakho-ke lokhu kumele kuqedwe.
“Labo abagangela amanina kanye lamankazana besebenzisa imithi kabahlukane lakho ngoba mina vele ngizimisele ukubabamba bonke,” kuchaza uMutumwa.
