uMthunywa
Cornelius Luphahla
ZIBUKELE ibhayisikopo yamahala izakhamizi zesigabeni seSingeni eNkayi ngemva kokuba amanye amanina esithenjini evubane kwaba luthuli kubangwa ukudla okubuye lenjiva.
Indaba le esansumansumane yenzakale ngoLwesine kuviki ephelileyo lapho uLubelihle Ndebele abhuqane khona loSilibaziso Mkhwebu kubangwa impahla ebezibuye loMelusi Ndlovu ongumnawakhe womkabo.
UMthunywa ukhulumisane lesinye isakhamuzi sakule indawo uNkosazana Hleziphi Dlamini ochaze ukuthi yena wayekhona mhla kuvuka impi le.
“Mina ngangikhona mhla amanina la esilwa ebanga impahla lezo njalo yimi engawalamulayo. Kwathi ngethuba umnawakhe kaNdlovu efika evela eGoli wafikela komnewabo njengoba engakathathi.
“Impahla sezethuliwe emoteni uMaNdebele wazithatha wayazibeka endlini yakhe njengomfazi omdala,” kutsho uNkszn Dlamini.
Uqhubekele phambili njalo walandisa ngempi eyavuka ngemva kwalokho.
“Ngemva kwalokho uMaMkhwebu wezwakala esola ukuthi kungani unyanewabo ethatha impahla zonke ezifaka endlini yakhe kungakho kukhona okutshaya amanzi phakathi kwakhe lo Melusi. Kuthe kunjalo uMaNdebele wasukela uMaMkhwebu ngophini bahle baqala ukulwa.
“Lami ngazama ukubalamula kodwa ngehluleka kwaze kwanceda umkabo uNdlovu. Wathi eqeda kubalamula uMaMkhwebu wezwakala sesithi vele wakubona kudala ukuthi unyanewabo uthandana loMelusi,” kuveza uNkszn Dlamini.
Kuzwakale ukuthi ngemva kwalokho uMelusi wahle wasuka komnewabo wayahlala komalumakhe kwasekusithi uMaNdebele wayabika indaba le kosobhuku.
Ekhuluma lentathelizindaba uNkszn Silibaziso Mkhwebu uchaze ukuthi yena wayengazimiselanga ukuxabana lonyanewabo.
“Mina ngangingazimiselanga ukuxabana lonyanewethu njalo okwenza ngakhuluma kubi yikuthi ngasengithukuthele kakhulu yikho nje ngacina ngibaxolisa kanye lomnawakhe womkami,” kutsho uNkszn Mkhwebu.
Ebuzwa ngale indaba uSobhuku uMnumzana Bigboy Tshuma uchaze ukuthi uyayazi njalo yathoniswa kuye.
“Indaba le ngiyayazi yathoniswa edale lami, uMaMkhwebu waxolisa wathi uphambanisile, wayethukuthele kakhulu ngoba unyanewabo emncitshe ukudla okwakubuye lomnawakhe womkakhe yena esazi ukuthi laye kalakudla,” kuphetha uSobhuku uTshuma.
