uMthunywa
Ethel Ncube
ZISELE zikhakhamele izakhamizi zemapulazini eGeorgia eGwanda ngemva kokukhitshwa kwesibuko ebesisetshenziswa ukuvula amangcwaba abantu kuthathwe inyama zabo.
Insindabaphenduli le yenzakale emavikini amathathu adluleyo lapho ugogo uRaida Moyo ethathelwe isibuko okucatshangelwa ukuthi ubesisebenzisa ukwelapha lokuvula amangcwaba abantu athathe izidumbu.
Ekhuluma loMthunywa omunye wezakhamizi zakule indawo uNkosazana Elidah Ndlovu uthe kulesibuko esakhitshwayo endaweni yabo okucatshangelwa ukuba besisetshenziswa ukuganga.
“Kwenziwa umlindelo kwahlatshelwa kwabaluthuli, ngemva kwalokho sabona umphurofethi esethwele isibuko sigcotshwe imithi.
Isimanga asizange sitshelwe kuhle ukuthi ngesani.
“Esakuzwayo yikuthi ugogo ubesebenzisa isibuko ukwelapha kodwa kukhona okunye okungayisikho ayesekwenza ngesibuko lesi, asazi ukuthi kuyini, simelele ukuba baphenduke basichazele kuhle ngodaba lolu,” kubika uNkszn Ndlovu.
Uqhubekele phambili eveza ukuba abasiki bebunda yibo abazwakala besithi isibuko besivula amangcwaba.
“Mina ngezwa sekuphuma ebantwini kuthiwa isibuko sikagogo ubesisebenzisa lemangcwabeni.
Kuthiwa ubethi engasihlaba phansi ingcwaba livuleke bathathe abakufunayo baphinde balivale futhi,” kuveza uNkszn Ndlovu.
Iphephandaba likazulu lixhumane loSobhuku wakule indawo uMnumzana Phineas Sibanda ovumileyo ukuba udaba lwesibuko lwenzakala endaweni yakhe.
“Thina izibuko saqala sazibona kubo abaphurofethi labo zingezabo.
Lami ngangikhona kukhitshwa isibuko sikagogo uMaMoyo kodwa uhlupho lwaba sekutheni abazange bacace ukuthi ubesenzani okubi.
Ngikhuluma nje umphakathi wasala ulenga emoyeni ukuthi isibuko sikagogo satshiselwani njalo wayesenzani ngaso.
“Okokuthi sivula amangcwaba sekufuna kuvela kibo abaphurofethi ngoba mina angikuzwanga, bona balomlandu ukuthi basichazele kuhle kungakho lokhe sibalindile, asibaboni,” kuveza uSobhuku uSibanda.
Ekhuluma loMthunywa uMnumzana Nhlahla Ndlovu ongumphurofethi owayebizwe yisigaba uchaze ngesibuko esakhutshwayo.
“Endaweni le sahamba sibili safika sakhupha isibuko ebesisentshenziswa ngomunye ugogo ukuvula amangcwaba abantu.
Ubesithatha ebusuku ahlabe phansi ngaso ingcwaba livuleke angene athathe akufunayo aphinde ahlabe futhi ingcwaba livaleke lodwa.
“Isibuko lesi sasikhupha sabasa umlilo satshiswa ukuze angasisebenzisi futhi,” kubika uMnu Ndlovu.
Imizamo yokuxhumana loNkosazana Raidah Moyo onguye umnikazi wesibuko yehlule ngoba ucingo lwakhe lungangeni.
