uMthunywa
Thokozile Mbedzi
KUDABA okunathiswana ngalo itiye elokitshini leNkulumane koBulawayo, kulendoda yelinye ibandla okubikwa yenze into yamehlo yathumba untombazana oleminyaka engu-15, yamdakisa ngezidakamizwa okwensuku ezingu-17 imdlwengula.
Umetheswacala uMkhululi Ndlovu oleminyaka engu-42 kubikwa wathumba untombazana lo mhlaka 8 Mpalakazi ngehola lesikhombisa ntambama evela phelekezela abangane bakhe.
Kuzwakale ukuba wathi esendaweni eyaziwa ngokuthi kuseZiphaleni eNkulumane umetheswacala wafika wabamba umamangala andubana ambhemise isidakamizwa okungakatholakali ukuthi yisiphi kodwa esilombala omhlophe okwabangela ukuthi aquleke.
Izidakamizwa
Kuvele ukuba ngosuku olulandelayo waphaphama wananzelela ukuthi wayenqunu futhi elele embhedeni kaMkhululi kodwa engakhumbuli ngokwakwenzakale kuye.
Ekhuluma lentatheli kaMthunywa uNkosazana Mbalenhle Banda uthe isihluku esenziwa nguMkhululi kuntombazana lo siyesabeka.
“Njengabazali sitheneke amadolo ngesihluku esenziwe nguMkhululi yena ezenza ikholwa. Kambe athumbe untombazana oleminyaka engu-15 okwensuku ezingu-17 emdakisa ngezidakamizwa abuye amdlwengule. Kuyesabeka lokhu.
“Umntwana lo waphuma ephelekezela abangane bakhe ekuphendukeni uthe efika eZiphaleni kumhlaka 8 Mpalakazi wamnyenyela ngemva kwakhe wambamba ngamandla ukuba abheme isidakamizwa esimhlophe embambile ngemva kwalokho waquleka.
“Thina sezwa ugogo wakhe, ongumakhelwane wethu esekhala ngokuthi umzukulu wakhe kamboni, uphume ephelekezela abangane bakhe isikhathi seside njalo sokusebusuku.
“Sazama ukuthi sisabalale simdinge saze sayabikela amapholisa ukuthi umntwana kasimboni. Sahlala sisithi mhlawumbe uzabuya kodwa kwehlula sadinga ezihlobeni lakubangane bathi bamcine ephenduka endlini,” kulandisa uNkszn Banda.
“Kuthe ngelanga lesi-17 uMkhululi wasehamba laye ukuba ayethenga izidakamizwa eLobengula, yikho lapho athola khona ithuba waphunyuka wabaleka wancedwa ngomunye umama yena owamupha indawo yokulala ekuseni kusisa yikho inina leli elamhlanganisa khona loMfundisi webandla lakhe.
Kwasekubizwa ugogo wakhe ukuba ezomthatha.
“Esefikile ngakibo wasuka waya koBullet lomalume wakhe oleminyaka engu-20 lapho enelisa ukunanzelela uMkhululi wasembikela ngokwenzakala kuye. Umalumakhe wabikela amapholisa uMkhululi wabotshwa,” kulandisa uNkszn Banda.
Isikhulumi samapholisa koBulawayo uInspector Abednico Ncube uqinisekise ngodaba lolu.
“Sichwayisisa ngodaba lomntwana oleminyaka engu-15 owathunjwayo waphinda wahlukuluzwa emacansini.
“Umetheswacala usesezandleni zamapholisa njalo uyawancedisa ekuchwayisiseni ngalo. UMkhululi Ndlovu wetheswa icala lokuthumba lokubuye anike umamangala izidakamizwa andubana amdlwengule.
“Undoda lo wathumba untombazana lo mhlaka 8 kwaze kwafika umhlaka 24 Mpalakazi 2022,” kubika uInsp Ncube.
“Sifisa ukubonga uzulu ngokuphathisa ekuncediseni untombazana lo waze wafika ezandleni zezihlobo zakhe.
“Sixwayisa abazali ukuthi bavikele abantwana ukuze bengahlukuluzwa,” kuphetha uInsp Ncube.
