uMthunywa
Johas Moyo
INHLANGANISO ye-Environment Africa ebona ngezemvelo kusizwekazi seAfrica sikhuthaze uzulu ukuthi anqinekele ukugugudeka komhlabathi ngokuhlanyela izihlahla endaweni eziligceke.
UMqondisi wenhlanganiso le uBarnabas Mawire uthe endaweni ezinengi umhlabathi sugugudekile ngenxa yokuthi izihlahla ezinengi sezaganyulwa njalo lotshani kabusekho ngenxa yenkomo ezinengi ezidla utshani endaweni encane (overgrazing).
“Ngomnyaka kuganyulwa izihlahla ezidlula 300 000 kuleli kodwa akuhlanyelwa ezinye kungakho sithanda ukukhuthaza abantu ukuthi bavikele ukugugudeka komhlabathi ngokuvikela ukuganyulwa kwezihlahla.
“Abalimi kabahlanyele njalo ezinye izihlahla kanye lokudla okuzenza ukuthi inkomo zithole okunye ukudla zingahlali zisidla utshani endaweni encane ngoba lokhu yikho kuphela okunganqoba ukugugudeka komhlabathi,” kutsho uMnu Mawire.
UMnu Mawire uthe uzulu angahlanyela izihlahla bayabe sebenqobe ukugugudeka komhlabathi ngoba impande zazo kuyizo ezibamba umhlabathi ukuthi ungagugudeki.
“Abalimi abahlanyele izihlahla ukuze bavikele ukugugudeka komhlabathi njalo izihlahla lezi ziyancedisa ukuthi inkomo zithole ukudla lomthunzi.
“I-moringa ngomunye umhlobo wezihlahla ezingahlanyelwa ngabalimi elokudla okulungele inkomo njalo esisiza ngitsho labantu emikhuhlaneni etshiyeneyo,” kutsho uMnu Mawire.
Uqhubekele phambili uMnu Mawire ekhuthaza abalimi ukuthi abahlanyele njalo ameva ikakhulu ugagu lomkhaya ngoba elokudla okuhle enkomeni njalo izihlahla lezi zilempande ezinengi ezibamba umhlabathi ukuthi ungagugudeki.
