uMthunywa
Buhlebenkosi Gaule
INHLANGANISO ekhangela ngezokulima eyeAgritex isiqalisile ukukhuthaza kanye lokufundisa abalimi ukulima ingqoloyi ukuze kungezelelwe ukudla esiphaleni selizwe.
Ingqoloyi ivuma ngesikhathi somqando kungakho inhlanganiso le isiziphe umlandu wokufundisa abalimi ngokulinywa kwesilimo lesi esabelweni sakoBulawayo, eMatabeleland South kunye leMatabeleland North ngenhloso yokuthuthukisa isivuno sengqoloyi kuleli.
UMnumzana Social Shava onguAgronomist njalo ongomunye wabakhangela ngezokulima kulezi izabelo ubikele uMthunywa ngokunye abalimi okumele bakunanzelele nxa belima ingqoloyi.
“Ingqoloyi ingalinywa ngesikhathi somqando iba lesivuno esikhulu ngoba iyenelisa ukuba lamaxhakela amanengi okuyikho okwenza ibe lezikhwebu ezinengi.
“Kukanti ingahlanyelwa ngesikhathi sokutshisa kayixhakeli kakhulu njalo iyatsha masinya ngoba idinga amanzi amanengi,” kutsho uMnu Shava.
Uthe umlimi ofisa ukuyihlanyela kumele ayihaze nje ensimini noma ayithontisele emzileni, njalo ivuma emhlabathini oyisidaka noma oyisigodi ngoba umhlabathi lo uvundile kakhulu njalo lesilimo lesi sifuna umhlabathi ovundileyo.
Uqhubeke wathi ingqoloyi ithatha inyanga ezine kusiya kwezinhlanu ukuthi ivuthwe njalo ilungele ukuvunwa.
“Ekukhuleni kwayo ingahlaselwa ngumkhuhlane othiwa yi-rust, odala ukuthi amahlamvu ayo abe bomvana, lokhu kwehlisa isivuno ngoba amahlamvu la ayabe engasenelisi ukupheka ukudla okunengi njengoba ayabe sehlaselwe ngumkhuhlane.
Uchaze ukuba i-rust leyi ingavikelwa ngokuthelelwa kakhulu ngamanzi, umlimi loba engananzelela lowo mkhuhlane kumabele akhe kuyabe sekumele ayandise amanzi ensimini yakhe.
“Okunye okuhlasela ingqoloyi ngumtshazo ngoba uyomisa amahlamvu acine isitsha. Ngakho umlimi wengqoloyi ukhuthazwa ukuthi athelele kakhulu ukuze ingqoloyi yakhe ingahlaselwa ngumqando,” kuchasisa uMnu Shava.
Uphethe ngokuthi umlimi ofisa ukulima ihekitha yensimu udinga inhlanyelo engaba yi-100kg kusiya ku-120kg.
