uMthunywa
Buhlebenkosi Gaule
INHLANGANISO ezimele yodwa yeEmerald Agribusiness Consultancy ebona ngezokuhlolwa komhlabathi ikhuthaza abalimi bezigabeni ezehlukeneyo ukuba bahlolise ubumunyu bomhlabathi wabo ukuze balime izilimo ezifaneleyo ukuze zingatshiswa yibumunyu lobu.
Ukuhlolwa komhlabathi lokhu kuhlose ukukhangela izinto ezitshiyeneyo ezibalisela ubumunyu bomhlabathi (pH), ukuqina kanye lobuthakathaka bawo.
Kubikwa umhlabathi ungaba munyu kakhulu izilimo ziyatsha umlimi alahlekelwe yimali enengi kakhulu.
Umhlabathi okhulisa kuhle izilimo awumelanga ubemunyu kakhulu njalo akumelanga behle kakhulu ngoba izilimo zicina ziswela okunye ezikudingayo ukuze zikhule kuhle.
Ekhuluma lephephandaba likazulu uMnumzana Tapuwa Mashangwa onguChief Consultant e-Emerald Agribusiness koBulawayo ukhuthaze abalimi ukuba basebenze ndawonye labalimisi ukuze bathole ulwazi lokuhlola umhlabathi wabo.
“Ukuhlolwa komhlabathi ngezinye zezinto eziqakathekileyo kakhulu kubalimi ukuze bathole isivuno esiphezulu.
“Umlimi okhangelele ukulima endaweni entsha kumele ahlole umhlabathi wakhe ukuze abelolwazi oluzamphathisa ukuthi azi isilinganiso somvundiso okumele asithele emahlabathini kanye lokuthi umunyu okunganani.
“Umlimi angenza lokhu ngokusebenza ndawonye labalimisi kumbe ingcitshi kwezokuhlolwa kwenhlabathi,” kubika uMnu Mashangwa.
Uqhubekele phambili uMnu Mashangwa esithi umhlabathi okhulisa kuhle izilimo kumele ube le 5.5pH, ukwehla lokuqansa komvundiso kulakho ukuphambanisa ukukhula kwezilimo.
“Kuqakathekile ukuba abalimi babiye amasimu njalo balungise umvundiso wamahlamvu lamahlanga bawuthele emasimini.
“Abanye abalimi abalenkomo lembuzi balakho ukuthela ubulongwe benkomo lembuzi emasimini ukuze umhlabathi ube lokudla okweneleyo kwezilimo,” kuphetha uMnu Mashangwa.
