uMthunywa
YiNtatheli kaMthunywa
ZIZONDE zigane unwabu izakhamizi zeLupane kulandela ukuxotshwa kwabantwabazo abedlula 60 akade behlala esikolo lesi ngumphathisikolo weMlamuli Secondary eLupane.
Kubikwa abafundi laba bekele isikolo ngoba sebeswele indawo zokuhlala nanko phela bebehlala esikolo lesi (bush boarding) njengoba ngakibo kukhatshana lesikolo okungaba ngumango ongamakhilomitha angu-20. kusiya phezulu.
Indaba le iqale kuthemu ephelileyo lapho umphathisikolo weMlamuli Secondary School, uNkosazana Bonyongwe avale khona i-bush boarding kulesisikolo okubangele ukuthi abafundi laba abedlula 60 batshiye isikolo ngokuswela indawo zokuhlala.
UMthunywa uzwe njalo ukuthi lapho okuhamba khona abafundi labo kulenyamazana eziyingozi.
UMthunywa ukhulumisane loMnumzana Partson Ngulube oyisakhamuzi sesigabeni seQuarai wachaza ukuthi umphathisikolo lo nguye odale ukuthi abantwababo batshiye isikolo ngoba wabalela ukuba bafunde behlala esikolo.
“Kungakafiki umphathisikolo lo abantwabethu bebefunda kuhle lapha bezihlalela lababalisi esikolo. Khathesi umphathisikolo lo uthe efika wabaxotsha osokudale ukuthi bekele isikolo ngoba inengi labo lihlala khatshana kakhulu lesikolo,” kutsho uMnu Ngulube.
UMnu Ngulube uqhubekele phambili wachaza ukuthi ulabantwana ababili abekela isikolo ngenxa kamphathi lo.
“Ngikhuluma nje ngilabantwana ababili abangasafundiyo ngenxa yokuswela indawo yokuhlala. Okusuka kusidanise njengezakhamizi yikuthi umphathisikolo lo wafika wahlala yedwa endlini elezindlu ezinhlanu khonapho ezinye zakhona kazifakanga lutho okokuthi ngabe wavumela abantwana bahlala.
“Ngemva kwalokho waxotsha bonke abantwana ababefunda behlala esikolo engazange wakhulumisana lathi njengabazali,” kutsho uMnu Ngulube.
Ekhuluma loMthunywa uNkosazana Lisca Masuku oyisakhamuzi sesigabeni seNdlovu uthe abantwana abekela isikolo ngenxa kamphathisikolo banengi kakhulu.
“Ngenxa yokuxotshwa kwabantwana ababefunda behlala esikolo ngumphathisikolo kulabafundi abedlula i-60 abahle bekela isikolo ngenxa yobude bomango.
“Isimanga yikuthi sithe sisazama ukukhulumisana lomphathi wathi ngeke asilalele njalo uzazikhethela eyakhe ikhomithi yesikolo ngoba ekhona kayifuni.
“Asazi ukuthi kungani engayifuni kumbe uyenzela ukuthatha kuhle imali yesikolo azidlele,” kulandisa uNkszn Masuku.
Ebuzwa ngale indaba uNkosazana Bonyongwe uchaze ukuthi indaba yokwekela isikolo kwabafundi usayihlolisisa njalo ikhomithi izakhethwa yizakhamizi.
“Indaba yokuthi abanye abantwana abafunda lapha eMlamuli bekela isikolo ngenxa yokuswela indawo yokuhlala ngisayihlolisisa kodwa akusiqiniso ukuthi ngabaxotsha.
“Ikhomithi yesikolo kangizange ngathi ngizazikhethela kodwa izakhethwa yizakhamizi. ,” kutsho uNkszn Bonyongwe.
UMsekeli kaMqondisi wezemfundo esabelweni seMatabeleland North uMnumzana Jabulani Mpofu ebuzwa ngale indaba uchaze ukuthi abakayizwa.
“Indaba yokutshiya isikolo kwabafundi asikayizwa kodwa sizayihlolisisa ukuze siyilungisise,” kuphetha uMnu Mpofu.
