uMthunywa
Thokozile Mbedzi
ZILOKHE zinkemile izakhamizi zesigabeni seMathetshaneni Line eTsholotsho ngemva kokuba abantwana abangabafana bemuli yinye abaleminyaka engu-16 belwe omunye walimala kakubi kubangwa i-charger kamakhalekhukhwini.
Kubikwa abantwana laba okugodlwe amabizo abo ngenhloso yokubavikela babe lokungazwani kumbango we-charger ngesikhathi unina uSiphiwe Ncube oleminyaka engu-35 eye esibholaneni ukuya kukha amanzi.
Ekhuluma lentatheli kaMthunywa uNkosazana Siphethokuhle Sibanda uthe okwenzakale phakathi kwabantwana bakoNcube kuyesabeka.
“Sibone into yamehlo silapha kasilankani ngenkemenkeme esihlangane layo, abantwana laba bebesale bodwa ngesikhathi unina eyekukha amanzi.
“Baba lokungazwisisani ekusebenziseni i-charger omunye wazonda wadlulisa amalawulo wadobha ugodo watshaya omunye ekhanda kanengi.
“Lokhu kwangani akumsuthisanga wadobha ilitshe njalo wamgongoda ngalo kanengi ethi kafuni ukuphinda ambone ephila,” kutsho uNkszn Sibanda.
Kubikwa unina wathi ephenduka wathola omunye wabo ehlaba umkhosi.
“Unina uthe ethi mehlo suka wambona esebomvu gebhu ekhanda, wahle wabikela omakhelwane ngodaba lolu bamthwala bamusa ekilinika yeBubude lapho abafike khona bamhlola ikhanda livuvukile andubana bamdlulisele esibhedlela seMpilo koBulawayo,” kuchaza uNkszn Sibanda.
Isikhulumi samapholisa esabelweni seMatabeleland North ulnspector Glory Banda ebuzwa ngodaba lolu uvumile wathi solufile ehofisini yabo.
“Samukele umbiko wabantwana ababili abaleminyaka engu-16 abaxabane bebanga i-charger ngesikhathi umzali wabo eyekukha amanzi.
“Amapholisa akhuthaza abazali ukuthi bafundise abantwana ukuthi bangaphatheki kudlame njalo behlukane lezidakamizwa.
“Olimeleyo uthwalelwe eMpilo Central Hospital njalo usesimeni esibi.
“Lapho nxa kusuke kwaba lokungazwisisani kababikele abazali loba abaphathi bezigaba labeCounselling babeluleke,” kuphetha ulnsp Banda.
