Uncategorized

Zim@44: Umcimbi kazibuse eManicaland

18 Apr, 2024 - 00:04 0 Views
Zim@44: Umcimbi kazibuse eManicaland

uMthunywa

YiNtatheli kaMthunywa

YISIPHANSI phezulu lamuhla, wonke umuntu uphezulu kwenjabulo ngoba sikuZibuse.

Ilizwe lithakazelela iminyaka engu-44 yokuzibusa.

Umcimbi omkhulu wokuthakazelela uZibuse uzakuba khona esabelweni seManicaland.

Izolo, uMongameli uMnangagwa uqhube umcimbi wabantwana, okuyinhlalayenza iminyaka yonke nxa kusamukelwa ukuthola kukaZibuse kuleli.

Lonyaka ilizwe linanza lelilanga ngaphansi kwendikimba ethi: Ukubambana, ukuthula lengqubekela phambili, kukhangelelewe u-2030.

Kuminyaka edluleyo imikhosi yelanga likaZibuse ibivame ukuthakazelelwa eHarare kodwa uMongameli welizwe wathi umkhosi lo sekumele wenzelwe kuzo zonke izabelo, kulandelwa injongo yokungatshiyi muntu phandle elizweni, osekelwa nguHulumende.

Esabelweni sakoBulawayo, ilanga likaZibuse lizathakazelelwa enkundleni yeWhite City. 

UMphathintambo obona ngeziphathelene lesabelo sakoBulawayo uKhomuredi Judith Ncube ukhuthaze uzulu ukuthi asukumele phezulu.

“Uzulu kumele akholise njalo athakazelele uZibuse, abonge ngamaqhawe ethu, okuyiwo alwela inkululeko le esiyikholisa khathesi. Lusuku oluhle kakhulu. Kuzabe kukhona abahlabeleli abatshiyeneyo abazathokozisa uzulu. Njengesabelo sakoBulawayo sesithole okuncane okuzasincedisa emcimbini lo kodwa-ke sisakudinga okunye. Sifuna usuku lolu kube lusuku oluzakhunjulwa kakhulu ngakho sifuna uzulu athokoze,” kutsho uMphathintambo Ncube.

Ngokunjalo, eMatabeleland South abantu bazabuthana enkundleni yePhelandaba edolobheni leGwanda. UMphathintambo obona ngeziphathelene lesabelo seMatabeleland South uDokotela Evelyn Ndlovu uthe:

“Sikhangelele ukuthi iziqinti zonke zithi gwaqa, kube labantu abangu-3  000 abazagcwalisa inkundla, sithakazelela uZibuse. Sikhangelele kakhulu intsha ukuthi iphatheke kukho konke okuphathelane lelizwe. Abatsha yibo abazaphucukisa ilizwe,” kutsho uDkt Ndlovu

Esabelweni seMatabeleland North umcimbi uzabe useManjolo Business Centre, eBinga.

Enkabazwe kuhlanganwa eMbizo Stadium, edolobheni leKwekwe. 

Ekhuluma lentatheli, uMphathintambo wezokukhitshwa kwembiko kuHulumende uDokotela Jenfan Muswere uthe kuzabancane indawo eMurambinda.

“Sifake ama-LED screens amabili azatshenziswa emcimbini wabantwana besekusithi amane azasetshenziswa ngosuku olukhulu. Umongameli welizwe uzanikeza ama-computer angu -1 000 esigabeni seBuhera azabelwa ezikolo zonke. Kuzabe kulabahlabeleli abanengi abafika amatshumi amabili. Kuzakuba lomdlalo wenguqu phakathi kwamaqembu abalisa iSimba Bhora leManica Diamonds, Highlanders leDynamos,” kutsho uMphathintambo uDkt Muswere. 

 

Share This:

Sponsored Links

Survey


We value your opinion! Take a moment to complete our survey

This will close in 20 seconds