uMthunywa
Langelihle Moyo
KULENDODA yeMberengwa esigabeni seMaribha ngaphansi kwenduna uMataruse ebulele umntanayo, kulandela ukuxabana lendodana yayo kubangwa ukhuni.
Kubikwa mhlaka 6 kuyonale inyanga, uPardon Gumbo oleminyaka yokuzalwa engu-37 waba lengxabano loyise uShepherd Nhamo oleminyaka yokuzalwa engu-62 bebanga ukhuni, omunye engafuni ukuthi lubaswe.
Isikhulumi samapholisa esabelweni seNkabazwe uInspector Emmanuel Mahoko uveze ukuthi uGumbo wathatha ugodo efuna ukulufaka eziko kodwa uyise uNhamo wala wathi ugodo lolo lungabaswa, ngolwakhe.
Kubikwa uGumbo kazange amlalele uyise, waqhubeka wabasa ugodo lukayise okuyikho okwacunula uyise uNhamo, Wamdonsa ngekhola emtshaya ekhanda ngapha emtshaya ngezibhakela umzimba wonke. Kuthe kusenjalo kwasekufika uTrymore Gumbo oleminyaka yokuzalwa engu-29 walamula.
Intatheli kaMthunywa izwe ukuthi ngosuku olulandelayo mhlaka 7 kuyonale inyanga umuyi wavuka waya esibhedlela seZvishavane ukuthi ayekwelatshwa, lapho afika khona walaliswa. Kuthe mhlaka 10 isimo saba sibi kakhulu wasedlula emhlabeni.
“Umetheswacala uNhamo usezandleni zamapholisa, njalo uncedisa amapholisa ngokuchwayisisa udaba lolu ngokugcweleyo.
“Ngithanda ukukhuthaza uzulu ukuthi asizameni ukusebenzisa indlela ezingcono ezingeladlame ekuxazululeni ingxabano,” kuphetha uInsp Mahoko.
