Uncategorized

Ubulawe wangcwatshwa ngamahlahla efela iR5

11 Apr, 2024 - 00:04 0 Views
Ubulawe wangcwatshwa ngamahlahla efela iR5

uMthunywa

Thokozile Mbedzi

KUDUMA amakhanda kuzakhamizi zesigabeni seTjidie koMadlambudzi kulandela ukuzwa ngamadoda amabili abulele enye ayingcwabe ngamahlahla besola ukuthi yale ukubheja nge-R5, uMthunywa ukuzwile lokhu.

Isehlakalo lesi senzakale kuviki ephelileyo.

Kubikwa uMduduzi “Mdu” Sibanda loBlessing okungasatholakalanga isibongo sakhe babulele uTrust Ndlovu oleminyaka engu-35 yokuzalwa kumbango we-5 Rands emakhasini.

Ekhuluma lentatheli kaMthunywa uNdodana Moyo uthe ilunga lemuli yakhe life ngesihluku lifela imali engathengi lutho.

“Silahlekelwe ngendlela ebuhlungu, silapha sidabukile ngoba isihlobo sethu sife kabuhlungu.

“Amadoda lawa abedlala amakhasi kwasekuqhamuka umsindo kubangwa ukuba uTrust wale ukubhadala inkundla ngoba abanye ababili yibo ababevule inkundla ukuze kudlalwe.

“Ekuxabaneni lapha bahle bekela ukudlala badonsa uNdlovu baqonda laye ngemva kwelinye ibandla eliseduzane lalapho ababedlalela khona bahwatsha izigodo zothango bambhula ngazo umzimba wonke waze waquleka,” kulandisa uNdodana.

Bebona ukuthi usequlekile bamdonsela egangeni okungaba ngamamitha angu-500m bafika bamngcwaba ngamahlahla andubana bafulathele.

Kubikwa ngosuku olulandelayo omunye umfana ehamba egangeni wananzelela ukuthi kulamahlahla ayinqumbi wasesondela ekhangelisisa wabona kukhanya unyawo mbijana wahle wananzelela ukuthi kulomuntu.

“Umfana lo esebone isiga lesi wabikela izakhamizi ezabikela amapholisa aphenyisisa ngodaba lolu,” kulandisa uNdodana.

Isikhulumi samapholisa esabelweni seMatabeleland South uInspector Loveness Mangena ebuzwa ngodaba lolu uvumile wathi badingisisa ngendoda eyabulawa isidumbu savalwa ngamahlahla.

“Sichwayisisa udaba lwendoda ebulawe kubangwa i5 Rands emakhasini. Amapholisa axwayisa uzulu ukuba engabofaka umthetho ezandleni zakhe ngoba lokhu kulicala.

“Uzulu uyacelwa ukuba labo abangabe belolwazi lalapho okulamadoda lawa azise amapholisa aseduzane ukuze abasolwa laba babotshwe bajeziswe ngabakwenzileyo,” kuphetha uInsp Mangena.

 

 

 

Share This:

Sponsored Links

Survey


We value your opinion! Take a moment to complete our survey

This will close in 20 seconds