uMthunywa
Thokozile Mbedzi
ZILOKHE zinkemile izakhamizi zeTriangle ngemva kokuba umntwana oleminyaka engu-12 edliwe yingwenya ebhukutsha labanye bakhe ngeviki ephelileyo.
Kubikwa uKudzai Chikweza we-Village 13 uhlaselwe yingwenya wafa ngesikhathi ebhukutsha emfuleni uMutirikwi ngesikhathi belusile lomunye oleminyaka engu-7 labanye bakhe.
Ekhuluma lentatheli kaMthunywa uNkosazana Melody Baloyi uthe balokhe bedidekile.
“Sehlelwe yingozi, kulomntwana kamakhelwane ohlaselwe yingwenya ngesikhathi belusile labangane basebecabanga ukuyabhukutsha.
“Bathe bephakathi komfula bebhukutsha uKudzai wabanjwa yingwenya abanye bakhe sebebona omunye wabo esebanjwe yingwenya sokukhanya igazi phezulu.
“Abantwana laba bahle babaleka besiya emakhaya lapho abafika babikela abadala ngengozi le.
“Ubaba kaKudzai labanye omakhelwane bahle baqonda emfuleni bethwele izigodo bafika bangena emanzini bethusela ingwenya benelisa ukuba bathole umzimba wakhe.
Inkomo
“Sebewutholile bawuthwalela ngekhaya bahle babikela amapholisa ngodaba lolu,” kulandisa uNkszn Baloyi.
Isikhulumi samapholisa esabelweni seMasvingo uInspector Kudakwashe Dewa ebuzwa ngodaba lolu uvumile wathi solufikile ehofisini yamapholisa.
“Udaba lomntwana ongumfana oleminyaka engu-12 obulewe yingwenya ngesikhathi ebhukutsha labanye bakhe ngesikhathi belusile solufikile ehofisini yethu.
“Amapholisa axwayisa uzulu ukuba abazali labo bonke abakhangele abantwana kabaxwayise abantwana ukuthi bangabodlalela emfuleni ngoba kulengwenya phakathi ezingabahlasela njalo kungenzeka ukuthi bagalule.
“Abazali kuqakathekile njalo ukuthi babone ukuba abantwababo bavikelekile zonke izikhathi,” kuphetha uInsp Dewa.
