UZinjaziyamluma ungqikilana labaculi beMzansi

14 Mar, 2024 - 00:03 0 Views
UZinjaziyamluma ungqikilana labaculi beMzansi uZinjaziyamluma

uMthunywa

Ethel Ncube

UMCULI kaMaskandi ohlabela eseMzansi Afrika edabuka eTshololotso usekhethwe ngumsakazo weMzansi ukuba angene kuTop 30 angqikilane labaculi beMzansi.

UZinjaziyamluma ukhethwe yiKhozi FM kuTop 30 lapho akhangelelwe ukuba umqhudelwano wakhona ubekhona ngoMabasa, kuthi ozanqoba uzathola iQuantum.

UZinja ekhasini lakhe leFacebook uveze ukuba uthanda ukubonga uzulu olokhe emxhasa.

“Bantu bakithi ngicela ukuba sibambisane sibe munye sithandane sikhiphe inzondo lingivotele lonke silethe okuhle ekhaya.

Asivoteni ngobunengi bethu. Ngiyabonga ngoba selingitshengisile uthando lwenu ngoba bengihleli kunombolo-28 ngokuvota sengiku-8 khathesi imisebenzi yenu iyabonakala asiqhubekeni sivota. Ngicela sonke sivotele uZinjaziyamluma oseGoli uyathumela umlayezo ubhale Zinjaziyamluma 44893 uyathumela loba kangaki ngelanga,” kubika uZinjaziyamluma.

Uqhubekele phambili ezehlisa ecela ukuba uzulu wonke wasekhaya athumele emavoti.

“Ngicela sisababalise umbiko wami balandeli labangane bami. Linto ngeyakithi bantu abahle angikhaleli ukuba ngowokuqala kodwa loba ngingangena ngibe ngowesibili nje lami ngenelise  ukuba nxa kuphela ngenelise ukuyatshaya eMabhida Stadium labaculi beSouth Africa.

“Asizameni ngamandla onke bantu bakithi ngiyalithemba ukuba umehluko sungabakhona ngamavoti enu asivoteni nje sonke siphakamise isizwe sakithi ukuze ekucineni sijabule sonke. Asivoteni singalahli ithemba sizajabula ekugcineni sesinqobile ngiyalithanda lonke liqhubeke livota ngiyabonga,” kuphetha uZinja.

Share This:

Sponsored Links

Survey


We value your opinion! Take a moment to complete our survey

This will close in 20 seconds