uMthunywa
Ethel Ncube
AKUBIZWA ozwayo endaweni yobunandi, ePalace Gardens, koBulawayo, lapho okuzabe kudibene khona uGodolude leMlambos emcimbini kaZibuse ngoLwesihlanu.
Ziyabe zithobelene inkunzi ezimbili. Kuqembu leMlambosi yikho lapho okwaqhamuka ithalenta likaGodolude. Ukudibana kwabo, yikuhlangana kombalisi lomfundi.
UGodolude uzabe ekhokhela abafana bakhe abaziwa ngokuthi-Ezenergy.
Iphephandaba likazulu lixhumane loGodolude obike ukuba kuzakuba ncane indawo.
Umfanekiso lo uthethwe kuShutterstock
“Kuyabe kufiwa ePalace Hotel, kungadlalwa. Ngithi kubalandeli bomculo wethu, sikhona ngempelaviki yokuthakazelela uZibuse. Ngizadibana lezinkulu, engimbiza njengombalisi wami, onguye owangifundisayo, wangikhulisa kwezomculo.
“Ngiyajabula ukuthi ngizaqhunsa ezami ngisekelana leqembu leMlambos. Kodwa-ke, ngibatshelile ukuthi babambe ziqine ngoba ngizabadiliza bebhekile. Abalandeli lababukeli yibo abazafakaza. Khathesi ngibuya ngesivuvu esikhulu, kumele babambe ziqine,” kutsho uGodolude.
Uthe abathandi bomculo wakhe kabalinde ukujabula ngempelaviki.
“Sondelani balandeli sizokholisa izithelo zikaZibuse. Sizaliphakela okumnandi. Kumele ngibhuqe phansi umbalisi wami weMlambosi. Ngokubona kwami, ziyabe zithobelene inkunzi,” kutsho uGodolude.
