USikhosana ubonga abamphakamisayo emculweni

11 Apr, 2024 - 00:04 0 Views
USikhosana ubonga abamphakamisayo emculweni uSikhosana

uMthunywa

Ethel Ncube

UMCULI weNkayi ongaphansi kwenduna uNkalakatha, uSikhosana Buhlungu wethule isibongo esikhulu ngokuphakanyiswa emculweni ngesikhathi esemcimbini wakoDakamela.

USikhosana ubike ukuba ukubekezela emculweni kuyanceda ngoba yikho okumenze waphakama wabuye waduma endaweni ezitshiyeneyo.

Ekhuluma lentatheli uSikhosana ubike ukuba umculo asonto elula kodwa idinga ukubekezela.

“Ngikhuthaza abaculi bonke abakhangelane lobunzima ekuhlabeleni ukuthi babekezele baze bafike lapho abafisa ukufika khona. Mina ngaqala ukuhlabela kudala kodwa iminyaka leminyaka bengisehluleka ukuba ngingene ezingeni eliphezulu lami ngitshaye ikatali yami kuvungame phansi.

“Lamuhla ngilapha ngethula isibongo esikhulu kuMadlela Sikhobokhobo owasukuma phansi wangenza lami ngathola ukukhanya emculweni,” kubika uSikhosana.

Uqhubekele phambili ekhuthaza abanye abahlabeleli ukuba babambelele bangalahli ithemba.

“Bafowethu elihlabelayo lingalahli ithemba libambelele, iNkosi esiyikhonzayo izangenela iphathise umculo wenu uphakame. Mina ngapha komnyama ubambile sesilokukhanya nanku lathi nxa sisuka sihlabela kuphakame isizwe sonke. Ngamazwi amafitshane angibongi Madlela yedwa kodwa bonke abaphathisayo ukuba ngiphumelele njalo ngithole iziginci, umuzi lokunye okunengi, uNkulunkulu aphathise siphakamisane sibambane,” kuphetha uSikhosana.

 

Share This:

Sponsored Links

Survey


We value your opinion! Take a moment to complete our survey

This will close in 20 seconds