uMthunywa
Langelihle Moyo
UTHABE umanzi te u-Adoe ohlabela umculo we-Afro Pop koBulawayo kulandela ukuphumelela kwedlalade lakhe lokuqala ngqa, elilesihloko esithi, Uhambo lwami.
Idlalade leli lilengoma ezilitshumi lambili.
U-Adoe, ngokuzalwa obizwa ngokuthi nguVuyo Dube, uthe idlalade lakhe liveza imvelaphi yakhe, ukukhula kwakhe kuze kufike lesi isikhathi.
“Idlalade leli liveza ubuyimi, kusukela ngimncane kuze kufike lamuhla.
“Kungoma zami ezilitshumi lambili zikhona ezinye ingoma engazihlabela labanye abahlabeleli abagoqela uMandy Mae, Hwabaraty, Chichie the Poetic, Mzistoz Mfanafuthi, Thandy Dhlana loBekezela.
“Ingoma ezikudlalade leli ngezithi Amaphupho, Impilo, Ofana Nawe, Mkhul’ uBekezela, Impumelelo, Nakupenda, Masishade, Indoda, Ngeke Ngilibale, Yintoni, Shamiso, Nostalgia,” kutsho u-Adoe.
Umculi lo ukhulume ngengoma zakhe ezimbili, uNakupenda lethi Impilo echasisa ukuthi wazibhala njani.
“Ngesikhathi ngibhala ingoma Impilo kwakungekuhle kimi. Ngangingasebenzi ngingelamali, kwakuyimi nje lekatali yami. Besokusithi uNakupenda ngangisemathandweni, ngijabulile, konke kwakuhamba kuhle. Ngakho-ke ngithi kuzulu nanko umculo omnandi asiwuthatheni sijabule ngawo,” kutsho u-Adoe.
