uMthunywa
YiNtatheli kaMthunywa
KUSEHLAKALO esitshwaqisa umzimba, kulendoda yeDomboshava ebulele umkayo ngokumtshisa kulandela ukuba lengxabano ngokwabiwa kwempahla zomtshado ngemva kokuthola isehlukaniso.
Isihluku lesi senzakale mhlaka 15 kuyonale inyanga.
Kubikwa ababili laba, uAshley Kabaya lo Spiwe Jenyure isehlukaniso sabo sesiphumelele babelana impahla zabo abazithenga bebonke emtshadweni, kodwa ke ekwabelaneni akuzange kuhambe kuhle bacina bexabana okuyikho okwenza uKabaya acine sebulala umkakhe.
UKabaya wetheswa icala lokubulala umkakhe.
Kuvele ukuthi mhlaka 15 Mabasa uKabaya wavala umnyango wakhiya bephakathi lomkakhe wasemhlasela ngesigodo sokudlala igalufu. Kubikwa ngemva kwalokho wathela uJenyure nge-cobra lange-paraffin, andubana amlumathise umlilo.
Uthe sesitsha wazama ukulwisa edonsa uKabaya okwabangela ukuthi laye atshe.
Kuzwakale ukuthi uJenyure wahlaba umkhosi kwafika omunye owayesedlula owafika wakhahlela isivalo savuleka wangena wasezama ukucitsha umlilo encedisana lezinye izakhamizi ezasezifikile.
Benelisa ukubakhipha bobabili bagijinyiselwa esibhedlela se-Domboshava, kodwa ngenxa yesimo sabo esasingasihle badluliselwa esibhedlela esikhulu eHarare eParirenyatwa Hospital.
NgoLwesithathu ngeviki ephelileyo uJenyure wadlula emhlabeni kukanti uKabaya lokhe elwela impilo yakhe esibhedlela njalo ubhekane lecala lokubulala umkakhe.