uMthunywa
Thokozile Mbedzi
ZILOKHE zibabaza izakhamizi zelokitshini leMkhosana, eVictoria Falls ngemva kokuba enye indoda ife ngemva kokunatha itiye efakwe itshukela elidobhe okulahlwa khona izibi.
Isehlakalo lesi senzakale ngoMvulo kuyonale iviki.
Kubikwa uAllen Ncube lomngane wakhe, uAdmire Moyo bahambe bonke endaweni lapho okulahlwa khona izibi basebedobha itshukela abalifaka etiyeni okwabangela ukuthi uNcube afe.
Ekhuluma lentatheli kaMthunywa uInspector Glory Banda uthe kulamadoda amabili ahambe endaweni okulahlelwa khona izibi bafika badobha itshukela elicine libulele omunye wabo.
“UAllen loAdmire bahambe lapho okulahlelwa khona izibi bafika badoba itshukela ezibini. Sebeqedile ukwenza umsebenzi wabo njengansuku zonke bapheka itiye bafaka itshukela abalidobhileyo.
“Ngemva kokunatha itiye, ababili laba baqala ukungaphatheki kuhle emzimbeni okuyikho okwenza bananzelela ukuthi kutsho ukuba banathe itiye eletshefu.
“UNcube kwahle kwamqinela masinyane, uMoyo waphanga wayabikela abanye abaseduzane labo ngengozi isibehlele.
“Abanye babo baphuthuma bachola amalahle ukuze bakhuphe lakanye bakhupha okuyikho okwenza uMoyo wabangcono kodwa uNcube kwamqinela basebebiza imota yezigulane eyamusa esibhedlela seVictoria Falls Hospital,” kutsho uInsp Banda.
Uthe amapholisa asaphenyisisa ngodaba lolu.
“Uzulu uxwayiswa ukuthi atshiye umkhuba wokudla ukudla okusuka endaweni ezingalungelanga ukuba zihlale ukudla.
“Uxwayise abantu ukuthi bangadli ukudla okudojiweyo ngoba kungaba yingozi kumpilakahle yabo ngoba kwezinye izikhathi kuyabe sekuhlangene lengcekeza,” kuphetha uInsp Banda.
