uMthunywa
Thokozile Mbedzi
ZILOKHE zinkemile izakhamizi zesigabeni seMavhuku, eMasvingo ngemva kokuba enye indoda ibulale unkosikazi wayo kumbango kamakhwapheni ngeviki ephelileyo.
UMaster Mamvura oleminyaka engu-46 yokuzalwa ubulele umkakhe uNkosazana Chiedza Tarubherekera oleminyaka engu-42 kubangwa indaba zikamakhwapheni uMamvura akade esehlanyisana laye.
Ekhuluma lentatheli kaMthunywa uDorothy Sibanda uthe babone into yamehlo lapho esithi.
“Sibone into yamehlo, silapha sididekile ingqondo ngesenzo esenzwe nguMamvura esakhelane laye osuke wasexabana lomkakhe ngenxa kamakhwapheni.
“Omakhelwane bazwe ababili laba bekhuluma kodwa bakuthatha lula ukuba yikukhuluma nje bengazi ukuthi omunye uzacina esedlule.
“Ababili laba bathe bekhuluma bangabi lokuzwana okucine kubangela ukuba uMamvura abe lolaka ecabangela umkakhe ukuba usezamtshiya ayehlala lomakhwapheni.
“Omakhelwane bazwe ukukhulumisana bangasalandeleli ukuba ababili laba baphethe ngani kanti ilanga seliphume lendaba ezilusizi.
UNkosazana Tarubhekera utholwe yindodakazi yakhe eleminyaka engu-12 yokuzalwa elimele kakhulu. Umntwana uthe efika ngekhaya ngezikhathi zemini enkulu wathola unina elele echibini legazi elamanxeba atshonileyo ekhanda.
Inina leli belilimele kakhulu ekhanda kukhanya ukuthi litshaywe ngento esansimbi.
“Esebone lokhu umntwana wasesiyatshela uyisemdala uMnumzana Saratiel Mamvura owahle wayathwala inina leli walisa esibhedlela seMorgenster Mission Hospital lapho afike wadluliselwa eMasvingo Provincial Hospital wafika wedlula ngemva kwensuku ezinhlanu.
UMamvura kubikwa wahle wadliwa ngumswenya ngemva kokudala icala leli.
Isikhulumi samapholisa esabelweni seMasvingo uInspector Kudakwashe Dewa ebuzwa ngodaba lolu uvumile wathi solufikile kibo.
“Udaba lwendoda ebulale unkosikazi kubangwa umakhwapheni solufikile ehofisini yethu ngakho indoda le isitholakele njalo isolwa ngecala lokubulala,” kuphetha uInsp Banda.
