uMthunywa
Ethel Ncube
KULENDODA yesigabeni seMaboleni eLower Gweru etholakale igwaziwe yafa ngemva kokungazwanani lenye indoda kubangwa isithandwa sikamuyi.
Indaba le yenzakale ngoLwesine kuviki ephelileyo lapho umuyi oleminyaka engu-21 yokuzalwa uBrisky Moyo edojwe elele phandle ngemva kwesitolo egwaziwe.
Kubikwa ukuba uBrisky Moyo wahamba ezitolo zeMaboleni labangane bakhe ababili batshona benatha utshwala bonke.
Kuthe ngezikhathi zantambama uBrisky waxabana lomunye umuntu ongaziwayo kubangwa indaba zamankazana ezothando udaba lolu lwalungiswa.
Kunjalo abangane bakhe bangena kwesinye isitolo bafika bathenga utshwala yena esele phandle. Bathe bephenduka bamswela bangamboni.
Kuthe sekumnyama kwabuya omunye umfana owabona uMoyo elokhu elele phansi yena owabikela umama kaMoyo owabiza amapholisa.
UMoyo wagijinyiselwa esibhedlela seGweru athi efika khona bathi usedlule emhlabeni. Umzimba wakhe wakhangelwa watholakala ulenxeba esifubeni.
UMthunywa uxhumane lobambele isikhulumi samapholisa eMidlands uAssistant Inspector Fungai Ngawagare oveze ukuba udaba olunjalo balwamukele,
“Indaba le ifikile ezandleni zamapholisa sicela uzulu ongabe elolwazi ngokwenzakeleyo athinte amapholisa aseduzane laye. Sikhuthaza uzulu njalo ukuba nxa ethe wabalohlupho alungisise ngokuthula kungeladlame,” kuphetha uAsst Ngawagare.