uMthunywa
Langelihle Moyo
KULENDODA yeJotsholo esigabeni seManganganga eleminyaka yokuzalwa engu-21 emiswe emthethwandaba isetheswa icala lokudlwengula umntwana oleminyaka yokuzalwa elitshumi lambili evela esigayweni.
Kubikwa mhlaka 17 kuyonale inyanga, umsolwa uKudzanai Nyathi oleminyaka engu-21 umiswe emthethwandaba weLupane phambi kukamantshi uBarbra Ntabile Phiri esetheswa icala lokudlwengula umamangala oleminyaka yokuzalwa engu-12 evela esigayweni ehamba lomzawakhe oleminyaka yokuzalwa engu-14.
Umtshutshisi kulelicala, uZandile Laureen Ndebele uveze ukuthi mhlaka 24 Mabasa lonyaka, umamangala lomzawakhe babethunywe esigayweni ngugogo wabo. Bathe sebebuyela endleleni bahlangana lomsolwa uNyathi wabalandela wafika wathatha isaka lempuphu elalithwelwe ngumamangala walibeka phansi, ngemva kwalokho wadonsa umamangala waqonda egangeni, watshiya umzawakhe emi yedwa.
Kubikwa egangeni, umsolwa wahlubula umamangala impahla ngenkani andubana amdlwengule kanye. Umamangala wahlaba umkhosi kodwa umsolwa wamvala umlomo, ngenhlanhla umzawakhe kamamangala wayesezwile waphanga wayakhangela wafica inkemenkeme le watshela umsolwa ukuthi uzabikela abadala.
Umsolwa esizwa lokho wakhipha iUS$1, le 100rands wanika umzawakhe kamamangala njengesivalamlomo.
Kubikwa wabalaya ukuthi bayethenga abakufunayo ezitolo bengakayi ngekhaya. Bathenga amanamunede lokokunathisa okwe $3 bengakabuyeli ngakibo.
UNkszn Ndebele ubuye waveza ukuthi umamangala efika ngakibo walandisela ugogo wakhe ngokwakumehlele wabuye wamtshengisa lemali ababesele layo.
Ngemva kokuzwa lokhu ugogo kazange aphozise amaseko, wahle wayabikela amapholisa eJotsholo. Umamangala wagijinyiselwa esibhedlela se-St Luke’s ukuyahlolwa.
Umetheswacala uzabuyela emthethwandaba mhlaka 30 kuyonale inyanga, njalo uxwayiswe ukuthi afake isicelo sebheyili eHigh Court.
