uMthunywa
Ethel Ncube
UMCULI we-rhumba othandwa linengi labantu uNdux Junior Malaba usehwatshe idlalade elitsha elilengoma ezimnandi.
Umhlabeleli lo uhwatshe idlalade lakhe lesi-12 eyedwa. Ulamanye njalo ayisithupha awakhipha labanye.
Ekhuluma loMthunywa uNdux Junior uveze ukuba ukhiphe idlalade lakhe elitsha elokuphela komnyaka.
“Ngiledlalade lami elitsha elaphuma ngoLwezi eMzansi Afrika eYouville, ngikhangelele ukulikhipha njalo ePlumtree ekupheleni kwenyanga.
Idlalade leli lilengoma eziyisithupha ezibalisa ethi Abasiki bebunda, Badla bodwa, Kahleni bo, Intonga kababa, Sudze loStepmother. Ngedlalade lami leli ngethula isibongo sami kubalandeli bami ngithi nanku umculo wenu, sondelani lizitholele ingoma zenu ezimnandi likholise iKhisimusi lilalele i-rhumba,” kubika uNdux.
Uqhubekele phambili eveza ukuba abalandeli bakhe ubathembisa okuhle.
“Abathandi bomculo sibathembisa ukuhlala sibaphekela ingoma ezilekusasa ezilokwakha lenjabulo nxa besiseka ngokuqotho befaka izandla ngendlela efaneleyo. Sithi kubalandeli qhubekani lilandela umculo wethu lathi sizaqhubeka sisebenza gadalala,” kuphetha uNdux.