uMthunywa
Langelihle Moyo
BAQINISLE abadala nxa besithi ingoma emnandi iyaphindwa nanko uSibanengi Ndebele aka DJ Mzoe “Fudu” ulungiselela omunye umcimbi wabazalwa ngoMpalakazi odume ngokuthi ngamaBirthday Shellings.
Umcimbi lo uzakuba khona mhlaka 25 lo 26 Mpalakazi eHartsfield Tshisanyama koBulawayo.
Umcimbi wakuqala owenziwa ngenyanga kaNcwabakazi, wanyakazisa uzulu koBulawayo.
Ekhuluma lentatheli kaMthunywa uDJ Mzoe uthe umcimbi weDecember Shellings ngowokuthakazelela labo abazelwe ngoMpalakazi.
“Kuzabe kungumcimbi omkhulu owokuthakazelela labo abazelwe ngoMpalakazi. Bonke abangazange bathakazelele usuku lwabo lokuzalwa bamukelekile ukuthi babuye bazojabula kumaShellings,” kuchasisa u DJ Mzoe.
“Kuzabe kulendawo zokudlalela zabantwana ezigoqela i-jumping castle, trampolins lomncintiswano wokugida.
“Asambeni ngobunengi lemuli zethu siyekholisa. Lingakhohlwa ukuthi ukutshelwa yikuncitshwa ngakho kasihlanganeni khonale,” kuphetha uDJ Mzoe.
