uMthunywa
Ethel Ncube
KULEJAHA elidabuka eMatopo elicula umculo kamaskandi eselihwatshe idlalade elitsha eleValentines elikhuluma ngokufika kwesithandwa ngelanga lezithandani.
UButholezwe Jiyane ocula umculo kamaskandi uhwatshe ingoma yakhe ethi ‘Entathakusa’ isitsho ukuba isithandwa sizafika emadabukakusa ngelanga leValentine.
Intatheli ixhumane loButholezwe oveze obala ngengoma yakhe.
“Mina ngiqale ukuhlabela ngo-2019 ngihlabela umculo kamaskandi. Lokhe ngaqala ukuhlabela ngilamadlalade amabili, ethi Umakoti wami uyajola lethi Isikhindi sakhe. Ngilamasingle track amabili njalo. Idlalade ngilikhiphe kuyonale inyanga yezithandani lapho abathandanayo abazatshengisa uthando lwabo ngokuphana izipho ukuze bathole ukujabula ngalesi isikhathi. Ingoma le ethi entathakusa ikhuluma ngokuthi esami isithandwa siyafika emadabakakusa sizombonisa uthando. Ingoma le kahlekahle ngeyelanga leValentine.” kulandisa uButholezwe.
Uqhubekele phambili eveza ukuba ingoma yakhe itholakala kuziphi inkundla.
“Ingoma yami le ikhona enkundleni zokuxhumana nxa ufisa ukuyizwa kumbe ukuyilalela lesithandwa sakho. Uyanxofa kuYoutube uthi @Ntombiziyamfisa, kuTitok ikhona @ntombiziyamfisa. Sondelani bantu bahle lizilalele umculo wenu lilungisele izithandwa zenu ngengoma emnandi ekamaskandi.
“Ngithanda ukucina ngokubonga abalandeli bami labo bonke abafisa ukungilandela ngithi wozani ngobunengi, umuntu ngumuntu ngabantu ingoma le ngiyikhiphele abantu sondelani lingaphuthelwa yibunandi bodwa,” kuphetha uButholezwe.
