uMthunywa
UMDENI ufuna abotshwe owesilisa okuthiwa udubule wabulala umngane wakhe edinwe yikuthi ukhulelise udadewabo.
Umdeni wakoShongwe eMlaza uthe usathukile ngokubulawa kwendodana yawo okuthiwa idutshulwe ngumngane ongusibali obecasulwe yikuthi ukhulelise udadewabo.
USizwe Brian Shongwe (28), obeziphilisa ngokufaka ama-tiles, kuthiwa udutshulwe ngumngane wakhe ngoMgqibelo ephuma entombini yakhe.
Obehamba lomufi ongeke adalulwe ukuze avikelwe, utshele intatheli ukuthi umufi ubehambisele intombi yakhe iKFC lokunathwayo ngakibo kamsolwa.
“Ufike wanikeza intombi yakhe lezi zinto, bathi ukuxoxa kancane sase siyahamba. Sithe sisenyuka ngomgwaqo, siphuma ngakibo kwentombi yakhe, sahlangana lomfowabo wentombi kamufi.
Wabuza umufi ukuthi wenziwa yini ukuthi amjwayele kabi. Angazi ukuthi umufi uphendule wathini kodwa umfowabo wentombi yakhe umphushile kanti indawo yimbi, iyatshibilika wawa.
Uthe evuka umfowabo wentombi ubesekhiphe isibhamu, wase ezama ukubaleka kodwa wamdubula emhlane. Angazi ukuthi emva kwalokho kwenzekeni ngoba lami ngibalekile,” kutsho yena
Umalume kamufi, uMnumzana Spha Ngiba, uthe umufi ngesikhathi ebaleka uze wafika egcekeni lakubo kwentombi yakhe.
“Ngokuzwa kwami, intombi yakhe labebekhona bazamile ukumtholela usizo kodwa waphelela ezandleni zentombi yakhe. Asazi ukuthi umufi losibali wakhe bebebangani ngaphandle kokuthi ubedinwe ukuthi ukhulelise ingane yakubo.
Okubi ukuthi isenzo sakhe sesiphuce ingane engakazalwa umzali obezoyondla lomuntu obondla umdeni wakhe. Unina wengane ufunda uGrade11, ukhuliswe ngugogo. Asazi ukuthi ingane isizokondliwa ngubani ngoba bekuzoba ngcono uma uyise ekhona,” kutsho yena.
Uthe ngokuzwa kwakhe bebengaqali ukuxabana bebanga khona ukuthi ukhulelise udadewabo.
“Lolu daba belungalungiswa ngenye indlela kulokuthi kubulawe umuntu.
Umuntu obulala umuntu ngale ndlela uyingozi, asazi ukuthi yini asazoyenza kule ngane esesesiswini sikanina. Sifisa ukuthi amapholisa amfune aze amthole ukuze kuvikeleke nengane engakazalwa,” kutsho uNgiba.
UCol Robert Netshiunda, okhulumela amapholisa kulesi sifundazwe, uthe amaphoyisa aseMlaza aphenya icala lokubulala kulandela isigameko sokudutshulwa kowesilisa oneminyaka engu-28, okusolwa ukuthi ukhulelise owesifazane wakubo kamngani wakhe.
Uthe lesi sigameko senzeke emgwaqweni uSdeku Hadebe esigcemeni sakwa-F eMlaza ngoMgqibelo ebusuku. Umsolwa akakaboshwa.-Isolezwe
