uMthunywa
Langelihle Moyo
UZULU wakoBulawayo ulemibuzo eminengi ngebhatshi elingakhutshwayo elikaSipho Mercent Nyathi osebenza e-DabThree Events.
UNyathi lo, uzakhele udumo ngokukhokhela uhlelo lwe-podcast ebizwa ngokuthi “Enkundleni Exclusive”, esisabalale enkundleni zokuxhumana, egxile ngokusakaza imisebenzi yabosaziwayo edolobheni lakoBulawayo.
Kodwa ke, sebebuza bengaqedi abantu ukuthi kungani uNyathi engatshintshi ibhatshi kumabonakude. Lokhu sokusenza abantu babe lembono eminengi ngebhatshi leli eselingathi yi-Uniform.
Abanye bathi ngelomuthi, abanye njalo bathi walithola litshiphile emabhelweni. Kulokuvumelana ukuthi walithola esedubekile yikho engalikhuphi, okutsho ukuthi yilo lodwa alalo.
Ibhatshi leli lilombala olidube, lilemkhono emfitshane njalo kalijwayelekanga.
Intatheli kaMthunywa ixhumane lomngane kaSipho, uFedric Ndlovu mayelana lebhatshi leli, othe ibhatshi leli ladojwa emtshoveni bevela emfeni emakhaya.
“Ibhatshi likaSipho eselikhulunywa ngabantu, walidobha emtshoveni sivela emfeni kweyinye indawo emakhaya. Ekulidobheni kwethu, sazama ukudinga umnikazi, samemezela kodwa kwakhanya ibhatshi lingatholi umnikazi. Sacina sihamba lalo. USipho wathi uzaligcina mhlawumbe singathola umnikazi.
“Kuthe ngelinye ilanga ngambona eseligqokile ibhatshi leli. Kwangimangalisa kakhulu ukuthi kanti indoda le isithatha ngaphi isibindi esingaka. Ibhatshi lakhona libi lilemikhono emfitshane, lilemizila zila.
“Akusibhatshi okumele ligqokwe ngujaha omuhle njengo-Sipho. Nxa eligqokile sikhathi sonke liyabe litshwabhene, sengathi liphuma phakathi komqamelo. Ngake ngambuza ukuthi kanti yini enzima ukuthi aliwatshe, ali-ayine ukuze libukeke ngcono kodwa wanginika impendulo yokuthi walihambisa e-dry-cleaner kodwa akutshintshi lutho,” kutsho uNdlovu.
