uMthunywa
Ethel Ncube
KUZANYIKINYEKA iTsholotsho yonke ngekhefu lePhasika lapho okuzabe kudibene abahlabeleli abalodumo uMagwaza loZinjaziyamluma esitikini bejabulisa uzulu.
UClement Magwaza loZinjaziyamluma bazabe bevuthisa inkundla eMapulubusi, eTsholotsho ngoLwesihlanu ntambama kuze kuse kumkhosi esiwethe igama lokuthi yiBhundu Party.
UMthunywa uxhumane lomhlabeleli we-rhumba uMagwaza oveze ukuthi amalungiselelo omcimbi lo asesezingeni eliphezulu.
“Sesilindele ukuba ilanga lifike kuphela siyekokotsha eTsholotsho. Kuyabe kufiwa akusoze kulalwe lelolanga, kuzagidwa ilanga lize liphume.
“Ngiyabe ngihlangene lomhlabeleli kamaskandi uZinjaziyamluma ohlabela umaskandi. Sizabe sisonke esitikini kusetshenzwa kungadlalwa. Ngiyajabula njalo ukuthi sizakwethula ukudla kwamehlo sisonke.
“Uzulu simthembisa uluju lodwa emcimbini lo, abaseTsholotsho buyani sizojabula sindawonye,” kubika uMagwaza.
uClement Magwaza
Ekhuluma lentatheli umculi kamaskandi ohlabela eseMzansi Afrika uZinjaziyamluma ubike ukuba konke kuhamba kuhle.
“Konke okuphathelane lomcimbi weTsholotsho obizwa ngokuthi yiBhundu Party sekulungile. Mina ngiyafika eZimbabwe ngoLwesine ikanti i-band yami yonke iseZimbabwe kungakho sesilinde ukuba kufike ilanga siyekwenza esidume ngakho.
“Okunye engikuthakazelelayo yikuthi ngizabe ngiloMagwaza signcedisana esitikini, kuzazama zama iTsholotsho yonke. Ubunandi bonke sibuphethe ezandleni, sithembisa injabulo kuzulu lakuzakhamizi ezizafika emcimbini zizothokoza kanye lathi,” kuphetha uZinjaziyamluma.
