uMthunywa
Wayne Ncube
AKUBIZWA ozwayo lamhlanje, eHall yeNkulumane koSekusile lapho iqembu leVictory Siyanqoba Trust elihlele umkhankaso wokulwisa udlakela emphakathini lisebenzisa ezemidlalo.
Intatheli kaMthunywa ikhulumisane lomqondisi weqembu leVictory Siyanqoba, uDesire Moyo oveze ukuba umsebenzi weqembu lakhe yikubukisa ngezamasiko besebenzisa iziphiwo zabo ngenhloso yokuba uzulu angalahlekelwa yimvelaphi yakhe.
“Silethemba lokulwisa ubudlwangudlwangu kanye lokungazwanani obusemphakathini sisebenzisa ezemidlalo ukuze uzulu aziqhenye ngamasiko akhe,” kulandisa uMoyo.
Uthe umkhankaso lo yindlela yabo yokuhlanganisa abantu abehlukeneyo osungulwe liqembu leli.
Kubikwa umkhankaso lo uzaqala ngeWomen’s Laundry Café lapho omama abahlala elokitshini leli abazahlangana khona ndawonye behlanza impahla njalo bexoxisana ngabahlangana lakho emakhaya ukuze kutholakale izixazululo.
Ngemva kwalokho kukhangelelwe ukuthi kube leConstitutional Theatre Café lapho okuzabe sekuhlangene abesilisa labesifazana kuxoxiswana ngokuthi isisekelo sombuso sona sithini ngobudlwangudlwangu emakhaya.
Kukhangelelwe ukuthi i-Eziko Theatre Laboratory yethulele abantu ukudla kwamehlo okwamahola amabili lapho okuzahlabela abahlabeleli abehlukeneyo.