Isigilamkhuba sepholisa sitshontsha imali yamacala

24 Mar, 2016 - 00:03 0 Views
Isigilamkhuba sepholisa sitshontsha imali yamacala

uMthunywa

Buhlebenkosi Gaule
KULEPHOLISA leGwanda elimiswe phambi komthethwandaba lisetheswa amacala ayisikhombisa okutshontsha imali zenhlawulo yamacala ezifika i$2 025 le R5 600.

Ipholisa leli uGodknows Mpofu oleminyaka yokuzalwa engu-29 umiswe phambi komthethwandaba weGwanda esetheswa amacala ayisikhombisa okutshontsha kanye lobuqili kukanti amanye amahlanu asachwayisiswa.

Umsolwa ucele umantshi uSheila Nazombo ukuthi adinge ingqwetha andubana athonisiswe.

Umtshutshisi kulelicala uTererai Mahohoma walile ukuba uMpofu aphiwe ibheyili esalindele ukuthonisiswa kwamacala akhe ethi amacala la makhulu njalo umsolwa ulakho ukubaleka njalo angaphambanisa labafakazi.

Kubikwa mhlaka 18 lo 19 Zibandlela kulowonalo umnyaka uMpofu wathola imali engange $110 eyayivela emapholiseni okwakumele ayihambise ebhanga abesehambisa amalisithi enkambeni yamapholisa amakhulu eGwanda ayezawapha umabhalani weZRP.

UMpofu kubikwa wanika umabhalani amalisithi angayisiwo.

Amacala kaMpofu abesobala ngemva kokuba uConstable Wellington Takavarova ekhangelisise ukuba amabhuku emali alotshwe ngendlela eyiyo kodwa wasethola ukuthi kakufanani njalo sokukunengi okungaqondanga emabhukwini emali.

Esenanzelele lokhu uConstable Takavarova wazisa uChief Inspector uMuzzah Muyambirwa ukuba lokho okubhalwe emabhukwini emali kulokunye okungacaci kuhle. UChief Inspector Muyambirwa wahle wasukumela phezulu wadingisisa okungabe kuphambanisekile.

Ngemva kokuchwayisisa lokho bathola ukuthi uMpofu ebhalisa amalisiti emali kumabhalani  wabuya lamanye ayelenombolo ezazifana layephiwe inkamba yeFulabusi ZRP njalo usebenzise indlela efanayo ukutshontsha imali engange $1 915 le R5 600.

Share This:

Sponsored Links