uMthunywa
YiNtatheli kaMthunywa
ABAQOQI bomkhosi we-Intwasa Arts Festival koBulawayo sebebike ukuba umcimbi walonyaka obekumele uqhutshwe kuyonale inyanga kaMpandula usuzakuba khona ngoMpalakazi.
Umqondisi we-Intwasa Arts Festival u-Raisedon Baya, kumbiko wakhe okhitshwe ngeviki edluleyo, uthe ukwedlulisela phambili komkhosi lo kungenxa yokuthi bafisa umkhosi lo ubesezingeni eliphezulu.
Umcimbi lo, obukisa imidlalo ebalisa eyokulingisa, amafilimu, ukugida, ukucula, amasiko lemisebenzi yokuzithokozisa emphakathini koBulawayo, usuzaqhutshwa mhlaka 29 Mpalakazi kusiyafika umhlaka 31 Mpalakazi.
Ekuqaleni abaqoqi bomkhosi lo babebike ukuba uzakuba khona mhlaka 26 Mpandula kusiya ku- 1 Mfumfu.
“Umkhosi we-Intwasa usuzaqhutshwa mhlaka 29 kuMpalakazi kusiyafika ku-31 Mpalakazi 2022. Uhlelo olupheleleyo lwemicimbi luzakhishwa ngokuhamba kwesikhathi,” kutsho uBaya.
UBaya uthe loba kunjalo, ezinye inhlelo ze-Intwasa obekuhlelwe ukuthi zibe khona ngoMpandula zizaqhutshwa.
“Eminye imidlalo obekuhlelwe ukuthi ibe ngoMpandula njengomdlalo omutsha we-Umkhathi Theatre othi ‘Bayethe Nkosi’, Act of Man, Amplifying Girls Voices through Digital Arts Film Festival leminye izaqhubeka njengokuhleliweyo,” nguBaya lo.
