uMthunywa
Katshayi uyabulala sengifuna ukumtshiya
Khulu: Ngididekile kangazi lokuthi ngithini Khulu. Ngingumama oleminyaka yokuzalwa engu-31, sengileminyaka engu-12 ngithandana lomkami. Umkami uleminyaka yokuzalwa engu-36 njalo uleminyaka engu-7 engithethe.
Uhlupho engilalo Khulu yikuthi umkami katshayi uyabulala, sesiside isikhathi ngibekezela ngisithi mhlawumbe uzatshintsha kodwa kuyaphambili. Khulu kalandaba futhi kwezinye izikhathi ungitshaya phambi kwabantu loba phambi kwezihlobo zakhe kanye labantwana. Khulu ngifuna ukukutshela iqiniso uthando kangiselalo ngitsho. Lokhu sokungenze ngaze ngakhomba njalo ijaha lakhona selifuna ukuyavela kanye lokutshada lami. Ijaha engithandana lalo kangilitshelanga ukuthi ngendile. Ngenzeni Khulu? Ngeluleka.
Impendulo
Kunzima mzukulu ukuhlala lomuntu okuhlukuluzayo emzimbeni kulezinsuku. Kukanti kudala onyoko babesithi nxa bengatshaywa ngomkabo kabathandwa. Umhlaba usuguqukile mpela lokhu yikho okubizwa ngokuthi yi-domestic violence. Okokuqala usuke wahlala laye yini phansi umkakho wambuza ukuthi kungani ehlala ekutshaya njalo kakumyangisi yini ukukutshaya phambi kwabantu? Nxa usuke wakwenza lokhu okwesibili ongakwenza yikuyabikela abangakibo kanye labangakini ngempilo oyiphilayo. Nxa lokhu kungehlula mzukulu uyabe usukhululekile ukuthi uye emapholiseni uyembophisa ngoba umthetho kawukuvumi ukuthi akutshaye. Umkakho uyakwazi yini ukuthi nxa ekutshaya abantwana bekhangele labo bayahlukuluzeka emoyeni okucina kubenza bangakhululeki? Mzukulu ngiyazi ukuthi isenzo somkakho sephula umoya yikho nje usithi wena kawusamthandi kodwa angithi wawuzwe abanye omama besithi bahlalele abantwana yikho kanye okumele ukwenze. Bekezela mzukulu wami njalo ungadinwa ukutshaya phansi ngedolo ubikele uMdali wakho ngesimo okuso.
Iyatshaya inhliziyo yami nxa ngisiya emacansini
Khulu: Linjani Khulu? Ngiyindoda eleminyaka yokuzalwa engu-42. Ngangithethe njalo ngilabantwana abahlanu, abafana abathathu lamantombazana amabili. Umkami ubhubhe nyakenye. Uhlupho lwami yikuthi njengomuntu oyindoda ngiyake ngibe labangane besifazana kodwa zonke izikhathi ngingazama ukuthi sihlangane emacansini inhliziyo yami iyatshaya ngamandla. Sengizame ngehluleka. Umkami ngangimlobole ngaqeda kangilaso isikwelede kwethuzala. Nginceda Khulu?
Impendulo:
Abantu besilisa abanengi bangatshiywa ngomkabo bahlangana lohlupho olufanayo mzukulu. Okwenzakalayo yikuthi umuntu angatshiywa ngomunye wakhe akumelanga aphangise ukuhlangana labesifazana engakakhitshwa inzilo. Kukanti njalo amanye amadoda ahlangana labafazi labo embhedeni womfazi owabhubhayo. Kungakho ungalahlekelwa ngomunye wakho ziphe isikhathi sokukhalela isithandwa sakho kanye lokuzila ucansi. Landela lawe isintu sokuthi ucelelwe ngabakibo ukuthi usudinga umngane njengoba engasekho njalo lesikhathi sesiside. Okhokho bethu yikho babethatha isithembo besenzela uhlupho olufana lalolu ophakathi kwalo. Ongakwenza mzukulu yikuthi uye kibo komkakho uyecela ukuthi usufuna ukuthatha. Ungenzenjalo bazakuncedisa ukuthi ungaphindi uhlangane lohlupho olufanayo.
Usefuna omunye umntwana engalobolanga – Khulu: Khulu ngilabantwana ababili abangamankazana kodwa umkami usefuna owesithathu. Uthi sizame umfana mina kangikamfuni ngoba umkami kakaze ayevela kwabakithi. Sengizamile ukuthi ngithi kaye khipha loba ngukangaziwe nje kodwa uthi uzahamba engathola imali. Khulu kambe imali yake yatholakala inengi ngasikhathi sinye kumbe le ekhona iyahanjiswa ingatholakala enye ikhitshwe. Mina engikufunayo yikuthi abangakithi bazi umuntu engihlezi laye. Kambe ngingabe ngiphambanisa yini Khulu?
Impendulo:
Mzukulu ngiyakuzwa okutshoyo kodwa wena lomkakho, esibiza ubudlelwano benu sithi ngumasihlalisane, laphambanisa ngokuhlala lonke abadala bengakwazi. Ngiyathaba kodwa ngoba usufuna ukukuqondisa kodwa kumele uphathiswe kulokhu. Yana kwesinye isihlobo somkakho uyesichazela ngesifiso sakho ukuze akhulume lomkakho. Limqotho sibili ukuthi imali kayitholakali iyisigaqa kodwa le ekhona ingaphathisa kakhulu ukuthi umkakho ayevela ngakini. Kulezinsuku imikhuba lamasiko sekuxubana kungakho kuzakuba buhlungu mhla kuzenzakala ingozi mhlawumbe udlule kulumhlaba umkakho abesethwala luklubhu abakini sebesithi abamazi kumele alobole isidumbu. Bayabe bengaphambanisi futhi ngokutsho njalo ngoba kabamazi okusemthethweni bazi nje ukuthi umntanabo uhlezi lendoda. Mzukulu zama ukwenza lelicebo mhlawumbe omunye wakho angakuzwisisa acine esiya ngakini lawe ubusuzamdingela indlalifa ukhululekile emoyeni.
