Zibukhali inyawo kuDivision One

09 May, 2024 - 00:05 0 Views
Zibukhali inyawo kuDivision One

uMthunywa

Innocent Kurira 

KUHLOHLWE amabhola angamatshumi amabili ngeviki yokuvula isizini yeZifa Division One emhlubulweni ongezansi yelizwe.

Inkundla zeligi le zivulwe ngempelaviki edluleyo. Abadlali ababili bahlohle amabhola amabili ngamunye ngeviki elifanayo.

Umdlali weZPC Hwange uJustin Kaunda wahlohla amabhola amabili iqembu lakhe linqoba iMosi Rovers 4-1. UMthulisi Manela owe-Ajax ngomunye owahlohla kabili. Amaqembu amabili, iZimbabwe Saints leBulawayo City ngezinye ezivule isizini kuhle. 

ISaints inqobe i-Adachi nge 1-0. Abafana beBulawayo City bagaxe ezimbili phezulu kweBosso 90, kumdlalo ophethe kuyi 2-1.

IZimbabwe Saints yakhitshwa kuligi le nyakenye kulandela ukwehluleka kwayo ukubhadala indleko zokuphatheka emncintiswaneni.

Leliqembu seliphendukile nanko phela lenelise ukubhadala isikwelede.

Ngokufanayo, iBulawayo City iphendukile ngemva kokususwa kuligi ngesizini ka-2022.

Isikhulumi seZifa Southern Region uBlessing Mbwanda uthe bakhangelele isizini enhle kulisizini.

“Isizini yethu iqale kakuhle njalo sikhangelele ukuthi iqhube ngokufanayo. Zinengi inkinga esadibana lazo ngomnyaka odluleyo, ngakho sifuna ukuthi kube lengqubekela phambili kwelizayo,” kutsho uMbwanda.

Kusenjalo, inhlanganiso ephethe umdlalo kulumhlubulo welizwe, ibike ukuba isibambane lenkampani yeRugare Medical, okubikwa izasekela ngemali umvuzo womdlalo ozadlala kuhle okwedlula abanye inyanga ngenyanga.

Umvuzo lo uzaphiwa njalo kunozinti obanakale enze kuhle ngokuphatha imidlalo.

Impumela ngeviki edluleyo, kuvulwa isizini:

Indlovu Iyanyathela 1-0 Jordan Sinnot, Mosi Rovers 1-2 ZPC Hwange, Talen Vision 1-1 Nkayi United, Bulawayo City 2-1 Bosso 90, Adachi 0-1 Zim Saints, Casmyn 0-1 Victoria Falls City, Ajax  1-4 Mainline, DRC 2-0 Zebra Revolution

Imidlalo elandelayo:

Nkayi United v Jordan FC, Bosso 90 v Indlovu Iyanyathela, Mainline v Bulawayo City, Victoria Falls City v Ajax Hotspurs, ZPC Hwange v Casmyn, Zebra Revolution v Mosi Rovers, Zimbabwe Saints v DRC United, Talent Vision v Adachi FC.

 

 

Share This:

Sponsored Links

Survey


We value your opinion! Take a moment to complete our survey

This will close in 20 seconds