Nkosilathi Sibanda
IQEMBU leVictoria Falls Suns libezintshantshu zeligi yeMatabeleland North Basketball Top Teams League ngokuqeda isizini liphezulu njalo linganqotshwanga.
Iligi le, egoqela amaqembu amahlanu aphuma eHwange leVictoria Falls, iphele ngoMgqibelo odluleyo. Amanye amaqembu akuligi yiRoyal Eagles Academy, Titans, Black Hornets kunye leVictoria Falls Panthers.
Intshantshu zithole imiklomelo engu-12. Endaweni yesibili kubeliqembu lePanthers elilemiklomelo engu-10, ngemva kokunqotshwa imidlalo emibili. IRoyal Eagles ilandele kunombolo yesithathu ilemklomelo eyisitshiyagalo lunye.
Iqembu leTitans liqede lisendaweni yesine, iBlack Hornets yabamba umsila. Umdlali we-Victoria Falls Suns u-Isaac Sibanda utshayelwe ihlombe ngokukhethwa njengomdlali owedlule bonke phakathi kwesizini.
Umgcinisihlalo weVictoria Falls Suns uWalter Masunda ubike ngokujabula kulandela ukunqoba kwabo.
“Sithanda ukuhalalisela iqembu lethu ngesizini enhle kuligi yeMatabeleland North Super Six. Ukuphumelela kwethu kuyibufakazi bethalenta lethu, ukusebenza nzima, lokuzinikela. Eqinisweni, sinqobe ngesikhathi sobunzima lapho iligi yethu ibiphethwe yiziphathamandla zamaqembu. Kutshengisele ukuqina lokuzimisela kwethu.
“Lokhu sikubona njengethuba lokukhula njalo sinxusa iziphathimandla zomdlalo wethu ukuthi zicabangele abadlali bethu ukuze bathole indawo kuqembu lesizwe. Siphinda njalo sidlulise ukubonga kumaqembu eHwange ngokuzimisela kwawo emncintiswaneni,” kutsho uMasunda.
Umqondisi weMatabeleland North Top Teams League uBrighton John Musaidzi ubikele iZimpapers Sports Hub ukuthi benelise ukuqhuba iligi kakuhle, nanko amaqembu athole isikhathi sokudlala, okuyinto abeyidinga kakhulu ukuze kuvuselelwe umdlalo.
“Sidlale sakholisa, senelisa ukuqhuba kakuhle inhlelo zethu kumidlalo yeMatabeleland North Top Teams League ku-basketball.
“Iligi yethu isiphelile. Sibonga wonke amaqembu aphatheka kumidlalo yethu kusukela ngoNhlolanja. Sithi amhlophe kuqembu le-Victoria Suns,” kutsho uMusaidzi.
Uncome kakhulu indlela iligi yabo ethuthuke ngayo, wathi abadlali bawuphakamisile umdlalo wabo.
“Ngempelaviki edluleyo uJustice Shoko odlalela iRoyal Eagles Academy yeHwange udlale kuhle kakhulu njalo wenelise ukuthola imiklomelo elitshumi lanhlanu lanxa behlulwe bedlala leqembu lePanthers. UDuncan Mabhena lo-Enock Rosi badlale kuhle kuPanthers. UMabhena udlale umdlalo wonke leRoyal Eagles ethola imiklomelo engu-13, ehlohla amabhola ayisithupha.
“UWalter Masunda loLancelot Moyo, abaqale isizini leVictoria Falls Suns andubana baye kuPanthers, bebebambene ngama-average ayisitshiya galolunye emdlalweni, ngamunye ngamunye,” nguMusaidzi lo.
