Amakhosi abilisa amanzi okucutha inkukhu

09 May, 2024 - 00:05 0 Views
Amakhosi abilisa amanzi okucutha inkukhu uBekithemba Ndlovu

uMthunywa

Nkosilathi Sibanda

ICHICKEN INN nxa ikhuluma lezinye ithi indala kuleBulawayo Chiefs. Enye iyala njalo ithi angeke ivume.

Umbango ophakathi kwamaqembu la uzagcwaliseka mhla edibana kumdlalo weligi yeCastle Lager eLuveve ngoMgqibelo.

Kuzabe kungumdlalo wetshumi lanye kumkhankaso weligi yenguqu ephakemeyo kuleli.

Zombili zingomakhelwane. Impi yazo kayingenwa njalo izaxazululwa yizo zombili ngemva kwemizuzu engu-90 ngempelaviki.

Ngokuma kwesimo sengalane yeCastle Lager, iBulawayo Chiefs ithe khoxo kunombolo yesithupha iphethe imiklomelo engu-15. Umakhelwane wayo, ozibika emdala kulayo, iChicken Inn ukunombolo yesine, ebambe imiklomelo engu-16.

Akusoze kwabalula kuzo zonke ngoMgqibelo.

Umahluko ngokudlala kwamaqembu womabili ulichatha nje, okutsho ukuba ngempelaviki kuzadibana amaqembu alinganayo.

Lokudelelana kukhona emaqenjini. 

Mhlaka 17 Mabasa ngesizini edluleyo, kwabonakala ukuthi akusoze kwabalula ukwehlukanisa amaqembu la. Mhla welanga zidibana kumdlalo weligi lapho okwaphetha kungutshiki lobhanqa 2-2.

Kwanceda unyawo lukaMthokozisi Msebe, owahlohla ibhola lokucina elalinganisa amaqembu womabili, kumdlalo owawuseLuveve.

Umsekeli kamqeqetshi weBulawayo Chiefs uBekithemba “Super” Ndlovu uthe bazafuna ukuthi bayikhulele iBulawayo Chiefs.

“Ngumdlalo wasekhaya. Nxa uwukhangele ngamehlo akhatshana unzima. Liqiniso lelo. Silungiselele ukuthi singene enkundleni sijonge ukunqoba,” kutsho uNdlovu.

Esizwa ngalokhu, umsekeli kuzwa weChicken Inn uMcCloud “Moyez” Moyo uthe: “Akulanto enjalo. Ngizwa besithi isicuthwa eLuveve. Angeke sidliwe nje sikhangele. Sizayitshaya iBulawayo Chiefs,” kutsho uMoyo.

Lomqeqetshi wama-Gamecocks uJoseph Antipas uvumelane loMoyo.

“Siliqembu elifuna ukunqoba. Sisemsebenzini, ngakho sikhuluma ngokomsebenzi. Silolongela ukudlalela ukunqoba,” ngu-Antipas lo, ekhuluma lentatheli yephephandaba likazulu ngoLwesithathu emini.

Imidlalo yeCastle Lager ngeviki letshumi lanye:

NgoMgqibelo:

Green Fuel v ZPC Kariba (Greenfuel Arena), Yadah v CAPS United (Rufaro Stadium), Bulawayo Chiefs v Chicken Inn (Luveve Stadium), Simba Bhora v Ngezi Platinum (Wadzanayi Stadium)

NgeSonto:

Manica Diamonds v Bikita Minerals (Sakubva Stadium), Highlanders v FC Platinum (Barbourfields Stadium), Hwange v Arenel (Colliery Stadium), Dynamos v Herentals (Rufaro Stadium), Telone v Chegutu Pirates (Bata Stadium)

 

 

 

Share This:

Sponsored Links

Survey


We value your opinion! Take a moment to complete our survey

This will close in 20 seconds