Nkosilathi Sibanda
UNGCWATSHWE emathuneni eLady Stanley, okuveze ukuthi ubengumuntu wabantu koBulawayo.
Yikho lokho okuveze isisindo sempilo kaBheka “Mahii” Sibanda, usaziwayo kwezenguqu koBulawayo, obengumlandeli wodumo weqembu leqembu leHighlanders.
Umuyi udlule emhlabeni ngempelaviki edluleyo njalo ngesikhathi efulathela umhlaba, ubesephethe isikhundla sokuba ngumsekeli kamgcinisihlalo weqembu le-Arenel Movers, elidlala kuligi yeCastle Lager.
Ubeleminyaka engu-49.
Kungxoxo yakhe yakuqala lephephandaba likazulu uSibanda wayekhuluma ngomkhankaso wakhe wokufuna ukuba lilunga lekomithi yeqembu leHighlanders ngoZibandlela. Wanqotshwa okwesibili nanko wake wazama ngokhetho olwedlulayo.
Ubeyithanda iHighlanders uMahii.
NgoLwesithathu ekuseni, uzhizhi lwabantu lutheleke eBulawayo Amphitheatre bevalelisa usaziwayo lo, owaphakamisa inengi labadlali asebebizwa njengengcitshi kuHighlanders.
USibanda, kulabo abamaziyo, nguye owayephethe impilakahle yabafana ababizwa ngokuthi ngo- “ball boy” enkundleni.
Uzakhunjulwa kakhulu ngabadlali ababalisela u-Eric Mudzingwa, Lawson Nkomo, Andrew Mbeba loPeter Muduhwa.
Laba ngabanye abadlali abalolongwa nguSibanda ngendlela zokuziphatha enkundleni. Nguye lo owayefika ethwele amanamunende lezithelo zokunikeza abafana laba ngesikhathi sekhefu emdlalweni.
Lokho wayekwenza ngoba elothando leHighlanders njalo engafuni ukuthi abhadalwe.
Ngelanga lomngcwabo wakhe, kuthe gwaqa bonke osaziwayo bomdlalo wenguqu koBulawayo, okutshengise ukuthi ubengumuntu wabantu.
Ukungcwatshwa emathuneni eLady Stanley, kuhle kwaveza ukuthi umuyi ubengumhlonitshwa. Bacule bengaqedi abalandeli beHighlanders enkonzweni yokuvalelisa uMahii.
Ngaphandle kokuba lilunga eliphathisa iHighlanders ngesikhathi sobunzima, uSibanda ubehlonitshwa futhi njengosomabhizimusi.
Amathuna eLady Stanley ngawabantu abakade bephilela ukusiza umphakathi, belesisindo emphakathini.
Yiso isimilo sikamuyi uMahii.
Loba wehluleka ukuthi athole isikhundla ayesifuna kuBosso, uMahii kazange ayikhafule ekaMatshobana.
Umsekeli weHighlanders uNduduzo “Teekay” Ncube uthe bakwamukele ukuthi umuyi usebheke kwelabokhokho.
“Usitshiyile uMahii. Usitshiyele umsebenzi omkhulu, wokuthi sinakekele iqembu loba singabalandeli balo. Hamba kahle mfowethu, hambe kahle Mahii,” kutsho uTeekay.
Inkokheli yebhodi yeHighlanders uLuke Mnkandla uthe: “Ngiyengeza ubuhlungu esilabo, ngisithi silusizi. Siduduza imuli yakoSibanda ngokulahlekelwa.”
Umongameli we-Arenel Movers uHandsome Ncube wethule amazwi athobele ngobuhle ngempilo kaNcube.
“Ubelamacebo ngempumelelo yeqembu. Ukusitshiya kwakhe kubeyikulahlekelwa kweqembu.”
