uMthunywa
Ethel Ncube
IMBONGI edumileyo yakuleli ephuma esigabeni samaJahunda uLerato Nqindi Ndlovu inxuswe eJohannesburg eMzansi Afrika lapho akhangelelwe ukuhaya inkondlo ngempelaviki.
UNqindi uzabe eseBooysens Hotel eJohannesburg, ngoMgqibelo emini lapho okuzabe kusethulwa idlalade likaMthokozisi Ncube ongumhlabeleli waseMzansi.
UNqindi ukhangelelwe ukuthi laye angene enkundleni ahaye inkondlo ezitshiyeneyo kunye lezibongo zabantu abatshiyeneyo bakuleli abaseMzansi.
Ekhuluma lentatheli kaMthunywa, uNqindi uveze ukujabula ngoba imisebenzi yakhe isihlonitshwa emazweni akomakhelwane.
“Ngijabule ngimanzi te ngilapha ukuba lami ngizathola ithuba lokuyahlanganyela labanye esitiki eMzansi abenza umsebenzi ofana lowami. Nginxuswe ngomunye umhlabeleli weGoli uMthokozisi Ncube lapho azabe ekhupha idlalade lakhe ngoMgqibelo.
“Umcimbi lo uzabe useBoysens Hotel njalo ngikhuthaza abalandeli bami abaseMzansi ukuthi babuye ngobunengi babo bazongisekela,” kubika uNqindi.
Uqhubekele phambili eveza ukuba ukubizwa kwakhe kuzamnika ithuba lokuba aziwe ngcono.
“Ukubizwa kwelinye ilizwe kuyakwenza uphakame njalo ibizo lakho licina likhula, lidume indawo yonke.
“Kungakho ngiyabonga kulabo abanginxusileyo ukungipha ithuba leli ukuthi ngizohaya inkondlo zami. Ngizaliphathela uluju lwendlebe kasihlanganeni khonale sikholiseni ndawonye,” kuphetha uNqindi.
