uMthunywa
Cornelius Luphahla
Iqembu lodumo elicula umculo weRhumba iKhethuza Jive band liza lazo lonyaka nanko phela selikhuphe idlalade elitshisayo elithathekise uzulu emkhosini weTsholotsho Arts and Culture Festival.
Leliqembu elasungulwa ngo2003 likhiphe lelidlalade elithi Umenzi Wobubi kuviki ephelileyo layalidlala ngeSonto kumkhosi wabaculi obuseTsholotsho kwavungama uzulu wonke.
UMthunywa ukhulumisane lomholi waleliqembu uCanaan Ncube wathi idlalade leli balikhiphe ngenhloso yokufundisa kanye lokujabulisa uzulu.
“Idlalade leli silikhiphe ngenjongo yokujabulisa uzulu kanye lokumfundisa ngendlela okufanele ahlale ngayo esigabeni. Ingoma ethi umenzi wobubi eyiyo eyisihloko sedlalade lethu ifundisa kakhulu ngokuthi izihlobo kanye labanye abantu bengaze baba lomhawu ngokuphumelela kwabanye abantu ikakhulu ontanga ngoba kuyinto embi.
“Ingoma le ngayisungula ngemva kokunanzelela ukuthi abantwana abanengi ikakhulu abangelabazali basuka bathakathwe yizihlobo zabo bengaphumeleli okuyinto embi kakhulu. Kukhona njalo eyinye ingoma ekulelidlalade efundisa kakhulu ngokuqakatheka kwemfundo,” kuchaza uCanaan Ncube.
“Ingoma le ithi Ondofa esikolo njalo ngayisungula ngemva kokunanzelela ukuthi izikolo ezinengi ziyavalwa ngenxa yabondofa abahluphayo ngakho ngikhuthaza izakhamizi ukuthi zingaphambanisi ukufunda kwabantwana ngokuthumela ondofa abahlupha ababalisi,” kutsho uCanaan Ncube.
Ekhuluma lentatheli omunye wamalunga aleliqembu uMangisi Muleya uthe lelidlalade abalikhiphileyo ngelesihlanu njalo bayabonga usekelo abaluphiwa ngabalandeli.
“Lokhe salisungulayo leliqembu sesakhipha amadlalade ayisithupha. Elakuqala ngelika2003 elithi Masela masela, kuze elika2005 elithi Sikhathi senjabulo, kuze elika2008 elithi Qhwayilahle, kuthi elika2014 elithi Zanele, sasesiphetha ngaleli elika2016 elithi Umenzi wobubi.
“Njengeqembu siyabonga kakhulu usekelo esiluphiwa nguzulu emculweni wethu ngakho sikhuthaza umphakathi ukuthi uqhubekele phambili usisekela, lathi kasisoze sidele ukuwujabulisa njalo sisazovakatshela uzulu simzwisa idlalade leli,” kuphetha uMuleya.
