uMthunywa
Thokozile Mbedzi
INHLANGANISO ebona ngezokulima eyeAgritex ikhuthaza abalimi ukuthi babhalise ukuze bathole inhlanyelo ngaphansi kohlelo lweCommand Agriculture.
UMatabeleland South Provincial Agritex Officer uMnumzana Mahocha Masauso uthe khathesi yiso isikhathi sokulima izilimo zomqando kungakho abalimi nxa bebona ukuthi kabalampahla yokulima ebalisa inhlanyelo, umvundiso lokunye babhalise ukuze baphiwe nguHulumende.
“Yisikhathi sokulima izilimo zomqando khathesi kungakho sikhuthaza abalimi ukuba babhalise ukuze bancediswe nguHulumende nxa bengenelisi ukuthenga inhlanyelo.
“Thina esikufisayo njengenhlanganiso yeAgritex yikuthi kungabi lamasimu angasoze alinywe ngoba umlimi engelamali yokulima.
“Thina sifuna abalimi balime babe lesivuno esikhulu njalo bathole lokokuhambisa esiphaleni selizwe ukuze kube lokudla okunengi elizweni.
“Abalimi kabasondele kithi sincedisane labo njalo labalimisi abaseduzane labo baqakathekile, kumele bababikele konke abangabe bekufisa ukuze bengehluleki ukulima ngoba bengelampahla yokulima,” kutsho uMnu Masauso.
Uqhubekele phambili ebikela abalimi ukuthi uhlelo lweCommand Agriculture ngolwabo kungakho abalimi kumele bakhululeke babuze noma yini ephathelane lezokulima ukuze bathole ulwazi lonke abalufunayo ukuze kulwiswe indlala elizweni.
“Kumele abalimi bakhululeke ukubuza noma yini ephathelane lezokulima kunhlanganiso yeAgritex ukuze bathole isivuno esiphezulu.
“Abalimi kumele bazi ukuba uHulumende utholisa abalimi usizo lwempahla yokulima ngoba esazi ukuthi ilizwe lethu liphethwe ngezokulima kungakho abalimi kumele balime amasimu wonke ngobunengi bawo,” kuphetha uMnu Masauso.
