uMthunywa
Ethel Ncube
MHLAKA 5 lo 6 Mabasa kuzabe kuphithizela koDakamela, eNkayi lapho induna yakule indawo eqoqe umcimbi wokuhlonitshwa kwabo bonke abenza kuhle kuleli okukhangelelwe ukuthi bamukeliswe izicoco.
Induna uDakamela uchaze ukuthi ngaphansi kweChief Dakamela Awards uzahlonipha ngezicoco abenze kuhle emasikweni, kwezomculo, intuthuko ezigabeni kanye labenze imisebenzi yobuntu.
Uthe kumkhosi lo, bakhangelele ukuhlonipha abantu abavela koDakamela, abavela ezigabeni zeNkayi kanye labavela esabelweni sonke seMatabeleland.
“Izicoco lezi sizazipha abantu bonke jikelele, kasilankethabetshabi, lizanazelela ukuthi lonyaka sizakhangela lemisebenzi yaboTonderai Shoko owenza kuhle ekuhlanzeni indawo yakoBulawayo.
“KoDakamela sizapha abantwana besikolo abenze kuhle kanye lababalisi abasebenze nzima ukuthi abantwabethu baphumelele ezifundweni.
Umfanekiso lo uthethwe kuShutterstock
“Kusigaba sobuntu esikukhangelayo yimisebenzi yobuntu. Kulondoda okuthiwa nguMlondolozi Mpofu oweNkayi kuminyaka emihlanu edluleyo owathi esiya eHwange wathola imota yeSafeguard ibhewukile wafika wathwala abalimeleyo ngemota yakhe wabahambisa esibhedlela wabuye watshayela inkampani yakhona ucingo wabapha imali yabo.
“Akwenzayo kutshengisa Ubuntu, ngomunye laye ozathola isicoco,” kubika induna uDakamela.
Uqhubekele phambili eveza ukuba amalungiselelo omcimbi lo asekuzinga eliphezulu.
“Amalungiselelo omcimbi ahamba kuhle. Abantu bazabalapha koDakamela okwamalanga amabili sisenza umcimbi lo. Sizabe silabosaziwayo ekuphekeni, bayabe bekhona besiphekela ezimnandi,” kuphetha uDakamela.
