uMthunywa
Silo Mehleli Dube
Indoda ezala mina yona engasekho emhlabeni yayihlezi iqonqosela ukuthi akulanhlamba ongathuka ngayo umntwana engedlula ukangamusi esikolo, njalo umuntu ongafundanga ungamtshela ukuthi kafundanga uzonda akhukhumale anuke okobulongwe bechalaha obunethwe yimbolisamahlanga. Ngezwa usizi ngikhuluma labanye abafundi ngibabuza ukuthi kungani intsha yalamuhla ingasela ndaba lesikolo.
Ngithemba liyake libone kubomakhalekhukhwini izithombe zezinto ezenziwa ngabantwana besikolo.Imfundo yilifa elingetshatwa muntu njalo alitshiyelwana njengelifa lenkomo kumbe ibhizimusi. Uhamba lalo egodini lakho. Bathi njengoba kungela misebenzi babona kuyikucitha isikhathi bakhohlwe ukuthi akusoze kuhlale kunje, ngomunye umnyaka nxa siphila bazakhumbula ithuba lokufunda abadlala ngalo.
Ngiyangizwe abanye othebula, ngitsho abalweli benkululeko kaZibuse, besithi kungasimpi eyabaphambanisayo ngoba izikolo kwezinye indawo zavalwa ngabe bangababalisi kumbe odokotela. Phela umuntu ongafundanga ulula ukuthi umbone ikakhulu ungalalela nxa ekhuluma.
Bakhona abaswela ithuba lokuya esikolo ngezizatho ezifana lokuswelakala kwemali kungasindaba yabo, kodwa ophiwa ithuba adlale ngalo uzasisola kwelinye ilanga abanye sebentwintwiza yena esephenduke isimungulu. Lempilo yalezinsuku isiguqukile, sesiphila ensukwini ze-technology kusebenza ukutofatofa inkinobho zezinto ezifana labo-laptop amakhumpuyutha zona ezifuna ulwazi oluvela esikolo.
Imfundo iyajulisa kabanzi ingqondo yomuntu, loba engaqhatshwanga kuba lula ukuthi akhande amasu okuziphilisa amlethela imali angela kungcola ngitsho engela kuchitheka kwegazi. Kubafundi ngithi kini nxa ithuba lisesekhona bamba ziqine ezifundweni, ungayengwa zinkanuko zomhlaba ngoba ngeke zikuse ndawo uzahlekwa lazinyoni.Khumbula osowenu abadlala ngethuba namhlanje bakhala isililo somkhoba. Phambili lemfundo. Ayixabene.-Mehleli Nkunziyembongolo Dube 0714355641
