uMthunywa
Inengi labakhwenyana balezinsuku angazi ukuthi selangenwa yini emakhanda abo. Kuvamile ukuthi umtshado abasawuqakathekisi wona oyiwo okhomba ngempela ukuthi bathethe.
Ensukwini zalamuhla kuvame ukufika umkhongi (idombo) ezobika ukuthi dingelani ngapha, njalo inengi lithatha ngoba selifohlile emizini yabantu (owesifazana esezithwele). Kuthi nxa sekuthunyelwe umuntu ukuthi azocela umlilo njalo lentombazane iyabe isizithwele bajahe ukukhipha imali kakangaziwe lesivulamlomo.
Esikhathini esinengi iyabe isilela bafake ilanga bathembise ukuthi bazabuya ngosuku oluthize kodwa phinde ubabone, phela kuyabe kubalekelwa ukuthi untombazana angabelethi ehlala kibo kajaha isusu sakuqala funa kube lobunzima obufana lokuthi kwesinye isikhathi ucina untombazana ebeletha ngokusikwa ngodokotela, imvama kuyabe kusesatshwa ukuthi kwesinye isikhathi afe umntanabantu ebeletha. Phela ikhona imihlobo yabantu abakhalala izidumbu nxa belihlezi lomntanabo lingababikelanga kumbe baligwebe liphelelwe yisibaya ngoba befuna inkulungwane lenkulungwane zamadola eMelika andubana bangcwabe.
Umfanekiso lo uthethwe kuGetty Images
Uthole umdeni ususangene wadideka, bahlahlelane ngamehlo angathi ngumuntu ogibele isitimela esingayisiso ngoba sona nxa singasuka asimi loba ngaphi uzaze uyekwehla lapho esima khona esilindweni, sehlukene lemota ongamane uthi ngitshiya khonapho.
Banengi abazali bamantombazana abaqilwa ngokukhipha ukangaziwe umkhwenyana ahambe alobe kodwa ngapha ephethe ezalisa umntanabo aze aqede ithumbu kungakhitshwanga ngitsho lenkomo yohlanga kumbe ezamabheka. Mhlawumbe bathembe ukuthi esintwini akuvamanga ukuthonisa amalobolo, kumele kuvele ngaphakathi kwakho, ubonga abakwenuzala ukuthi bakuzalele itshitshimba lentokazi ozaphila lalo liyingxenye yakho lize liye kwehlukaniswa yikufa.
Ukuthatha umfazi akusiwo mandlwane, qala uqogelele izimali zakho ukwenzela ukuthi loba sebekugweba ungasheshi ukhalaze, kumele lawe utshengisele ukuzimisela, kukhanye ukuthi loba nje wenze iphutha wamona umntanabantu, kodwa enhliziyweni yakho yisiphalaphala esikuthethe amehlo.
Inkomo
Nxa ungakatshadi tshada kanti usameleni, loba ungakaloboli lobola, kumbe wesaba indleko zomtshado ukuthi uzamema izihlobo labangane, uyenelisa ukuyatshadela emthethwandaba okungela ndleko ezinengi.
Ayixabene.
074795033
