uMthunywa
Msilisi Dube
UGATSHA lukaHulumende olukhangele ngemitshina yokulimisa olweAgriculture and Mechanisation lukhuthaza abalimi ukuba bafundele izifundo zeMaster Farmers Scheme ukuze bethuthukise isivuno sabo.
Kubikwa izifundo lezi zilakho ukuthuthukisa isivuno somlimi ikakhulu nxa abalimi belime ngendlela abayabe befundiswe ngayo.
UMnumzana Bright Chisadza osebenza kugatsha lolu ukhuthaze abalimi bezigaba zonke ukuba bayekwenza izifundo lezi ukuze umsebenzi wabo ube lohlonzi.
“Izifundo lezi zijonge ukuthuthukisa umsebenzi wabalimi ngoba umlimi uzenelisa ukuthola ulwazi olujulileyo ngokulima izilimo ezithile, lokuzinakekela kuze kufike kusigaba sokuthi zivunwe.
“Isikhathi esinengi abalimi bayazibulalela isivuno sabo ngokuswela ulwazi lwendlela ezintsha zokulima ikakhulu kulesisikhathi lapho umumo womkhathi osuguquke khona,” kuchaza uMnu Chisadza.
UMnu Chisadza uqhubekele phambili wathi phezu kokuthola ulwazi abalimi balakho ukuthola ithuba lokuhlangana labanye abalimi ukuze babelane imibono etshiyeneyo engabathuthukisa.
“Ezikolo abalimi bahlangana labanye abalimi abavela kwezinye izigaba, kuthi ngemva kokuxoxisana umlimi uyenelisa ukuthola ulwazi olungamsiza,” kuqhuba uMnu Chisadza.
UMnu Chisadza uphethe ngokuthi ngaphandle kohlelo lweMaster Farmer’s Scheme abalimi balakho ukuyathola ulwazi olufanayo kumakolitshi abona ngezokulima elizweni lonke jikelele.
“Zinengi izikolo esezifundisa ngezokulima ngakho abalimi kabangene ezikolo lezo bayefunda,” kuphetha uMnu Chisadza.
